ۇلتتىق قور اۋديتى: 500 جوبا اياقسىز قالعان، 64 ميلليارد تەڭگەنىڭ ءىزى كۇماندى
استانا. KAZINFORM - جوعارى اۋديتورلىق پالاتانىڭ ءتوراعاسى ءاليحان سمايىلوۆتىڭ قاتىسۋىمەن وتكەن كوميسسيا وتىرىسىندا ۇلتتىق قور قاراجاتىنىڭ ماقساتقا ساي ءارى ءتيىمدى پايدالانىلۋىنا جۇرگىزىلگەن تەكسەرىس قورىتىندىسى قارالدى.
تەكسەرۋ نىسانالى ترانسفەرت ەسەبىنەن 3,4 تريلليون تەڭگەگە قارجىلاندىرىلعان 3 مىڭنان استام جوبانى، سونداي- اق كۆازيمەملەكەتتىك سەكتورعا بەرىلگەن 3,8 تريلليون تەڭگە وبليگاتسيالىق قارىزدى قامتىعان.
ءاليحان سمايىلوۆتىڭ ايتۋىنشا، ۇلتتىق قور ەسەبىنەن ناتيجەلى جوبالارمەن بىرگە بازالىق دايىندىعى جەتكىلىكسىز جوبالار دا قارجىلاندىرىلعان. كەيبىرىندە جوبالاۋ- سمەتالىق قۇجاتتاماسى، كەيبىرىندە جەر تەلىمدەرى بولماعان. سالدارىنان 394 ميلليارد تەڭگەنىڭ 500-دەن استام جوباسى توقتاتىلعان نەمەسە باسقا جوبالارمەن اۋىستىرىلعان.
پالاتانىڭ مالىمەتىنە سۇيەنسەك، ۇلتتىق قور قاراجاتىنىڭ ءبىر بولىگى باسقا كوزدەن قارجى تارتۋ مۇمكىندىگى بار جەرگىلىكتى دەڭگەيدەگى الەۋمەتتىك جوبالارعا باعىتتالىپ كەتكەن.
كەي جاعدايدا قاراجات اياقتالىپ قويعان جوبالارعا نەمەسە ناقتى قاجەتتىلىكتەن جوعارى كولەمدە بولىنگەن. كەيدە ءتىپتى اۋىلداعى مەديتسينالىق ينفراقۇرىلىمعا ارنالعان قارجى قالالىق نىساندارعا باعىتتالعان. ال كەي وڭىرلەردە جابدىق ساتىپ الۋ كولەمى جوسپاردان ەكى ەسەگە دەيىن اسىپ كەتكەن.
ريەۆيزيا وبليگاتسيالىق قارجىلاندىرۋدى باقىلاۋ تەتىكتەرى جەتكىلىكسىز ەكەنىن كورسەتكەن. سونىڭ سالدارىنان قايتارىمى تومەن جوبالاردى قارجىلاندىرۋ، جەڭىلدىكتى قارىزداردى ماقساتتان تىس پايدالانۋ جاعدايلارى تىركەلگەن.
- 2023-2024 -جىلدارى ۇلتتىق قوردان بولىنگەن قاراجاتتىڭ يگەرىلۋىنە جۇرگىزىلگەن تەكسەرۋ ناتيجەسىندە ءبىرقاتار قىلمىستىق ءىس تىركەلگەن. جۇمىس توبى نىسانالى ترانسفەرتتەردى تەك تولىق دايىندىقتان وتكەن جوبالارعا ءبولۋ، قاراجاتتىڭ سوڭعى الۋشىعا دەيىنگى قوزعالىسىن باقىلاۋ جانە ماقساتىنا ساي پايدالانىلماعان 64 ميلليارد تەڭگەنى قايتارۋ بويىنشا ۇسىنىستار ەنگىزدى، - دەپ جازىلعان رەسمي اقپاراتتا.
پالاتانىڭ مالىمەتى بويىنشا، كۆازيمەملەكەتتىك سەكتور سۋبەكتىلەرىنە بەرىلگەن وبليگاتسيالىق قارىزداردى مەرزىمىنەن بۇرىن قايتارۋ ماسەلەسى دەقاراستىرىلىپ جاتىر.
اۋديتورلار ۇلتتىق قورعا جاۋاپتى ءبىرىڭعاي ورگاننىڭ جوقتىعىن دا جۇيەلى ماسەلە رەتىندە اتادى. بۇل قاراجاتتىڭ تيىمدىلىگىن تولىق باعالاۋعا مۇمكىندىك بەرمەي وتىرسا كەرەك.
بۇعان دەيىن ۇلتتىق قوردىڭ اقشاسى 1 جىلدىڭ ىشىندە ەكى رەت ورتايىپ، قايتا وسكەنىن جازعان ەدىك.
