ۇلەسكەرلەر ۇرەيى: كەيبىر تۇرعىن ءۇي قۇرىلىسىنىڭ پروبلەماعا اينالۋ سەبەبى نەدە

استانا. KAZINFORM - جەرگىلىكتى اتقارۋشى ورگاندار مونيتورينگ جۇرگىزىپ قۇرىلىسى پروبلەماعا الىپ كەلۋى مۇمكىن 99 نىساندى انىقتادى.

ءىستىڭ ءمان-جايىن ونەركاسىپ جانە قۇرىلىس مينيسترلىگى قالا قۇرىلىسى جانە تۇرعىن ءۇي-كوممۋنالدىق ساياسات دەپارتامەنتىنىڭ قۇرىلىس سالاسىن دامىتۋ باسقارماسىنىڭ باسشىسى ەرلان كۇلىشيەۆ تارقاتىپ بەردى.

- بۇگىندە رەسپۋبليكا بويىنشا تۇرعىن ءۇي قۇرىلىسىنا ۇلەستىك قاتىسۋ سالاسىندا 42 پروبلەمالىق نىسان بار، ولاردى 2026 -جىلدىڭ ىشىندە اياقتاۋ جوسپارلانىپ وتىر. سونىمەن قاتار جەرگىلىكتى اتقارۋشى ورگانداردىڭ مونيتورينگ جۇرگىزۋ ناتيجەسىندە 99 قۇرىلىس نىسانى انىقتالىپ وتىر. ولارعا جەرگىلىكتى اتقارۋشى ورگاننىڭ رۇقساتى نەمەسە ءبىرىڭعاي وپەراتوردىڭ كەپىلدىگى بەرىلمەگەن. اتالعان قۇرىلىس نىساندارى بولاشاقتا پروبلەمالىق وبەكتىلەر قاتارىنا ءوتۋى مۇمكىن، - دەدى ەرلان كۇلىشيەۆ ەلوردادا «اتامەكەن» ۇ ك پ الاڭىندا وتكەن جيىندا.

سونداي-اق ونەركاسىپ جانە قۇرىلىس مينيسترلىگىنىڭ وكىلى كەيبىر تۇرعىن ءۇي قۇرىلىسىنىڭ پروبلەماعا اينالۋ سەبەبىن اتادى.

- پروبلەمالىق نىسانداردىڭ پايدا بولۋىنا ءبىرقاتار قۇرىلىس كومپانيانىڭ ازاماتتىق قۇقىقتىق قاتىناسقا سىلتەمە جاساپ، جەكە تۇلعالارمەن برون، ينۆەستيتسياعا قاتىستى ءتۇرلى شارتتار جاساسۋى سەبەپ بولىپ وتىر. مۇنداي شارتتار ازاماتتاردىڭ قۇقىعى مەن مۇددەسىن ءتيىستى دەڭگەيدە قورعاۋعا مۇمكىندىك بەرمەيدى. ناتيجەسىندە نىساندى تاپسىرۋ مەرزىمى كەشىگەدى، ساپاسىز قۇرىلىس جانە ۇلەسكەرلەردىڭ شىعىنعا باتۋىنا الىپ كەلەدى، - دەيدى مينيسترلىك وكىلى.

ەسكە سالايىق، بيىل 30 -ساۋىردە ءماجىلىس ۇلەسكەر اقشاسىنا تۇرعىن ءۇي سالۋ ەرەجەسىن جەتىلدىرەتىن زاڭدى قابىلدادى.

12- ماۋسىمدا سەنات ۇلەسكەرلىكتى رەتتەپ، ازاماتتىق قورعانىس جۇيەسىن نىعايتاتىن زاڭداردى قارادى.

اۆتور

داۋلەت ىزتىلەۋ