ەلەكتروموبيلدەردى قۋاتتايتىن ستانسيالار ءىرى كولىك دالىزدەرى بويىندا ورناتىلادى

استانا. KAZINFORM - ءىرى كولىك دالىزدەرىنىڭ بويىندا ەلەكتروموبيلدەردى قۋاتتايتىن ستانسيالاردى ورناتۋ جوسپارلاندى. بۇل تۋرالى كولىك مينيسترلىگى اۆتوموبيل جولدارى كوميتەتى ءتوراعاسىنىڭ ورىنباسارى انار عابدۋللينا ايتتى.

«قازىرگى كەزدە رەسپۋبليكالىق ماڭىزى بار جولداردىڭ بويىندا كولىكتەرگە ەلەكتر قۋاتىن بەرەتىن 23 ستانسيا بار. سونىمەن قاتار وسى باعىتتا ۇلتتىق وپەراتور وسى ستانسيالاردىڭ سانىن كوبەيتۋ جۇمىسىن جالعاستىرىپ جاتىر. ەلەكتر ەنەرگياسىمەن قۋاتتايتىن ستانسيالاردى جەتكىزىپ جاتقان «Qazaq Energy Charge» ج ش س، «MyCharge» جانە «Green Car» كومپانيالارىمەن بىرلەسە جول بويىندا اتالعان ستانسيالاردى ورناتۋعا ارنالعان ءتيىستى الاڭدار انىقتالىپ جاتىر. قوندىرعىلار «ورتالىق-وڭتۇستىك» ءدالىزى، «استانا-الماتى»، «الماتى-شىمكەنت» بويىندا ورناتىلادى»، - دەدى ا. عابدۋللينا ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا.

ونىڭ ايتۋىنشا، بۇل قوندىرعىلارعا ەلەكتر ەنەرگياسىن تارتۋ جۇمىستارىن ينۆەستورلار جۇزەگە اسىرادى. ولاردى ورناتۋ كارتاسىن ينۆەستورلار مەن «قازاۆتوجول» كومپانياسى بىرلەسە بەكىتەدى.

بۇدان بۇرىن حابارلانعانداي، بيىل جازدا قازاقستان اۋماعىنداعى ەلەكتروموبيل سانى 11 مىڭعا جەتتى.

اۆتور

رۋسلان عابباسوۆ