ۇكىمەت الداعى 3 جىلدا ۇلتتىق قوردان 6 تريلليون تەڭگە الماقشى
استانا. KAZINFORM - ۇلتتىق قوردان الداعى 3 جىلدا رەسپۋبليكالىق بيۋدجەتكە الىناتىن ترانسفەرتتىڭ كولەمىن ايقىندايتىن زاڭ جوباسى اشىق تالقىلاۋعا شىعارىلدى.
«قازاقستان رەسپۋبليكاسىنىڭ ۇلتتىق قورىنان 2025-2027 -جىلدارعا ارنالعان رەسپۋبليكالىق بيۋدجەتكە كەپىلدەندىرىلگەن ترانسفەرتتىڭ مىناداي مولشەرلەرى بەكىتىلسىن:
2025 -جىل - 2000000000 مىڭ تەڭگە؛
2026 -جىل - 2000000000 مىڭ تەڭگە؛
2027 -جىل - 2000000000 مىڭ تەڭگە»، - دەپ جازىلعان قۇجاتتا.
زاڭ جوباسىندا ترانسفەرتتىڭ بۇل مولشەرى الداعى ءۇش جىلداعى مۇنايدىڭ حالىقارالىق نارىقتاعى بولجامدى باعاسىنا سايكەس ەسەپتەلگەنى ايتىلعان.
«ۇلتتىق قورعا مۇناي سەكتورى ۇيىمدارىنان تۇسەتىن تۇسىمدەر بويىنشا مۇنايدىڭ 2025-2027 -جىلدارعا ارنالعان كەسىمدى باعاسىنىڭ مىناداي مولشەرلەرى بەلگىلەنسىن:
2025 -جىل - ءبىر باررەل ءۇشىن 42,3 ا ق ش دوللارى؛
2026 -جىل - ءبىر باررەل ءۇشىن 41,0 ا ق ش دوللارى؛
2027 -جىل - ءبىر باررەل ءۇشىن 39,4 ا ق ش دوللارى»، - دەلىنگەن زاڭ جوباسىندا.
قۇجات 16-شىلدەگە دەيىن اشىق تالقىلاۋدا بولىپ، كەيىن ماجىلىسكە جولدانادى. پرەمەر- مينيستر ولجاس بەكتەنوۆتىڭ وسى قۇجات تۋرالى ماجىلىسكە دايىنداعان تۇسىندىرمە جازباسىندا ۇلتتىق قوردان الداعى 3 جىلدا الىناتىن ترانسفەرتتەر مۇناي سەكتورى ۇيىمدارىنان ۇلتتىق قورعا بولجاناتىن تۇسىمدەردىڭ كولەمىنەن اسپايتىنى ايتىلعان.
«كەسىمدى باعا كەزىندە مۇناي سەكتورى ۇيىمدارىنان قازاقستان رەسپۋبليكاسىنىڭ ۇلتتىق قورىنا تۇسەتىن تۇسىمدەر 2025 -جىلى 2277,0 ميلليارد تەڭگە، 2026 -جىلى 2276,8 ميلليارد تەڭگە، 2027 -جىلى 2277,0 ميلليارد تەڭگە مولشەرىندە بولجانادى»، - دەپ جازادى و. بەكتەنوۆ.
اۆتور
ەسىمجان ناقتىباي
