كوشى-قون رەجيمىن بۇزعان 200 مىڭ شەتەل ازاماتى جاۋاپقا تارتىلدى
استانا. KAZINFORM - قازاقستانعا كەلەتىن شەتەل ازاماتتارىنىڭ دەنى كوشى-قون ەرەجەسىن ساقتايدى. بۇل تۋرالى ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ ءمالىم ەتتى.
- ەلىمىزگە كەلەتىن شەتەل ازاماتتارىنىڭ %97 زاڭ مەن كوشى-قون رەجيمىن ساقتايدى. ارينە، زاڭ بۇزىلعان جاعدايدا جاۋاپكەرشىلىككە تارتىلادى. بيىل ىشكى ىستەر ورگاندارى 200 مىڭ شەتەلدىكتى جاۋاپقا تارتتى، ونىڭ ىشىندە 46 مىڭ شەتەلدىك ەلدە بولۋ ءتارتىبىن بۇزعان. سونىڭ ىشىندە 10 مىڭ شەتەل ازاماتىنا قازاقستانعا 5 جىلعا دەيىن كىرۋگە تىيىم سالىنىپ، ەلدەن شىعارىلدى، - دەدى باۋىرجان الەنوۆ ۇكىمەت وتىرىسىندا.
ودان بولەك ەلىمىزدە 2 مىڭ جۇمىس بەرۋشى شەتەلدىڭ جۇمىس كۇشىن زاڭسىز پايدالانعانى ءۇشىن جاۋاپقا تارتىلعان.
- شەتەل ازاماتتارىن جۇمىسقا الۋ قاعيداسىن بىرنەشە رەت بۇزعاندارعا قاتىستى 7 قىلمىستىق ءىس قوزعالدى. وسى ورايدا، ەسكەرەتىن جايت، قىلمىستىق قۇقىقبۇزۋشىلىق جاساعاندار جازاسىز قالمايدى، - دەيدى ىشكى ىستەر ءمينيستردىڭ ءبىرىنشى ورىنباسارى.
بۇعان دەيىن شەتەل ازاماتتارى قازاقستانعا قانداي ماقساتپەن ءجيى كەلەتىنى تۋرالى جازعان ەدىك.
سونداي-اق پرەمەر-مينيستر كوشى-قون ساياساتىن جەتىلدىرۋگە قاتىستى مينيسترلەرگە بىرنەشە مىندەت جۇكتەدى.
