كوشى-قون اعىنىن ەسەپكە الۋدىڭ ءبىرىڭعاي سيفرلىق جۇيەسى ەنگىزىلەدى
استانا. KAZINFORM - «كەلەشەك مەكتەپتەرى» ۇلتتىق جوباسى اياسىندا جوسپارلانعان مەكتەپتەر جىل سوڭىنا دەيىن پايدالانۋعا بەرىلەدى. بۇل تۋرالى ۇكىمەت وتىرىسىندا پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين ايتتى.
سەرىك جۇمانعاريننىڭ ايتۋىنشا، پرەزيدەنت جولداۋىن ىسكە اسىرۋ ءىس-شارالار جوسپارىنىڭ الەۋمەتتىك بلوگىندا ءبىلىم بەرۋ، دەنساۋلىق ساقتاۋ جانە سپورتتىڭ قولجەتىمدىلىگى مەن ساپاسىن ارتتىرۋ بويىنشا ءىس-شارالار قابىلدانادى.
«كەلەشەك مەكتەپتەرى» ۇلتتىق جوباسى اياسىندا وسى جىلدىڭ سوڭىنا دەيىن بارلىق جوسپارلانعان مەكتەپتەردى پايدالانۋعا بەرۋ قامتاماسىز ەتىلەدى.
- بۇدان باسقا 115 العاشقى مەديتسينالىق-سانيتاريالىق كومەك كورسەتۋ نىسانى سالىنىپ، 2 پەريناتالدىق ورتالىقتىڭ قۇرىلىسى باستالادى. ەل ىشىندەگى جانە شەتەلدەن كەلەتىن كوشى-قون اعىندارىن ەسەپكە الۋدىڭ ءبىرىڭعاي سيفرلىق جۇيەسى ەنگىزىلەدى. الەۋمەتتىك سالادا «اقشا ازاماتتارعا» قاعيداتى ەنگىزىلىپ، ەلدىڭ بارلىق وبلىستارىندا وسال ساناتتاعى ازاماتتار ءۇشىن الەۋمەتتىك تولەمدەردىڭ مولشەرى ۋنيفيكاتسيالانادى. «قارىزسىز قوعام» جوباسىن ىسكە اسىرۋ جالعاسادى، - دەدى ۆيتسە-پرەمەر.
اۆتور
مارلان جيەمباي
