كوپ بيزنەس جابىلىپ، كولەڭكەگە كەتۋى مۇمكىن - ەدىل جاڭبىرشين
استانا. KAZINFORM - ءماجىلىس دەپۋتاتى ەدىل جاڭبىرشين ەلىمىزدە قوسىلعان قۇن سالىعى شەگىن كوتەرۋگە قاتىستى شەشىمدى جان-جاقتى تالقىلاپ بارىپ قابىلداۋ كەرەكتىگىن ايتتى.

- بيزنەس وكىلدەرىمەن، اسسوتسياتسيالارمەن اقىلداسۋ كەرەك، ارتىق قىلامىز دەپ تىرتىق قىلىپ الماۋىمىز كەرەك. جان-جاقتى تالداپ الىپ، شەشىم قابىلداۋ قاجەت. ءبىر جاعىنان بيزنەستى ءولتىرىپ الماۋىمىز كەرەك، ەكىنشى جاعىنان بيزنەستىڭ اشىق جۇمىس ىستەۋىن قامتاماسىز ەتۋىمىز قاجەت، - دەدى ەدىل جاڭبىرشين ءماجىلىستىڭ جالپى وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرە تۇرىپ.
دەپۋتاتتىڭ ايتۋىنشا، بيۋدجەتتىڭ دە تولۋىن ۇمىتپاعان ءجون.
- وسى ماسەلەلەر بويىنشا ءبىر كونسەنسۋسقا كەلۋىمىز كەرەك، ەرتەڭ كوپ بيزنەس جابىلىپ نەمەسە كولەڭكەلى بيزنەسكە كەتىپ قالۋى مۇمكىن. كەيبىر بيزنەس وكىلدەرى ءوز كاسىبىن بولشەكتەۋى دە مۇمكىن، - دەپ تولىقتىردى حالىق قالاۋلىسى.
سونداي-اق، ب ا ق وكىلدەرى ەدىل جاڭبىرشيننەن «قوسىلعان قۇن سالىعى شەگىن %20- عا كوتەرۋ باستاماسىن قولدايسىز با؟» دەپ سۇرادى.
- قيىن ماسەلە. مەندە بيزنەسپەن جۇمىس ىستەدىم، 12-دەن بىردەن 20-عا كوتەرۋ بيزنەسكە قيىنداۋ بولۋى مۇمكىن، - دەيدى ول.
كەشە ق ر پرەمەر- ءمينيسترىنىڭ ءبىرىنشى ورىنباسارى سەرىك جۇمانعارين ۇكىمەتتىڭ كەڭەيتىلگەن وتىرىسىندا نەلىكتەن قوسىلعان قۇن سالىعى شەگىن كوتەرۋ قاجەتتىگىن تۇسىندىردى.
بۇعان دەيىن ءماجىلىس دەپۋتاتى ەدىل جاڭبىرشين مىندەتتى الەۋمەتتىك مەديتسينالىق ساقتاندىرۋ (م ء ا م س) اينالاسىنداعى داۋ-دامايعا قاتىستى پىكىر بىلدىرگەن ەدى.
اۆتور
داۋلەت ىزتىلەۋ