ۋكراينا «تۇزاعىن» قازاقستانعا تاڭۋعا كىمدەر تىرىسىپ ءجۇر
استانا. KAZINFORM - رەسەي-ۋكراينا قاقتىعىسى اياسىندا الەۋمەتتىك جەلىدە قازاقستانعا باعىتتالعان اقپاراتتىق شابۋىلعا قاتىستى ساياساتتانۋشى ءادىل سەيفۋللين Kazinform اگەنتتىگىنە ەكسكليۋزيۆ پىكىر ءبىلدىردى.
ساراپشى ۋكراينانىڭ «تۇزاق» وپەراتسياسىنىڭ ماقساتى ىستانبۇلداعى الداعى كەلىسسوزدەرگە اسەر ەتەتىندىگىنە سەنىمدى.
- وسىناۋ قازاقستاننىڭ جاناما كومەگىنە قاتىستى كەز كەلگەن داقپىرت پەريمەتر بويىنداعى بارلىق جاڭا ويىنشىلاردى تەكە-تىرەس وتىنا تارتۋ ءۇشىن وتە ىڭعايلى قوزدىرعىش بولا الادى. دەگەنمەن، قازاقستان گەوساياسي شابۋىلدار جاعدايىندا ارزانقول ارانداتۋشىلىققا قارسى سالقىنقاندى پراگماتيزمدى پاش ەتۋىن جالعاستىرىپ كەلەدى، - دەپ اتاپ وتەدى ءادىل سەيفۋللين.
دەگەنمەن، مەديادا جانە Telegram كەڭىستىگىندە قازاقستاندى «رەسەي اۋماعىندا ۋكرايندىق درونداردىڭ شابۋىلىنا جاردەمىن كورسەتتى» دەپ ايىپتايتىن جالعان اقپاراتتىڭ كەزەكتى مارتە ورتتەي قاۋلاۋى ناقتى ساراپتامالىق باعالاۋدى تالاپ ەتەدى.
- بۇل مالىمدەمەلەر حالىقارالىق ارەنادا دا، سونىمەن قاتار قوعامىمىزدىڭ ىشىندە دە ەلىمىزگە سەنىمدى ۇزۋگە باعىتتالعان الىپساتارلىقتان وزگە دىم دا ەمەس. بىرىنشىدەن، قازاقستان بارلىق حالىقارالىق سانكسيالىق رەجيمدى دايەكتى تۇردە ساقتاپ كەلەدى، - دەدى ساراپشى.
2022 -جىلدىڭ تامىزىنان بەرى اسكەري ماقساتتاعى ونىمدەردى ەكسپورتتاۋعا تىيىم قولدانىسقا ەنگىزىلگەن. مۇنان بولەك، 2023-2024 -جىلدارى استانا اسكەري ماقساتتا كەز كەلگەن جاعدايدا قولدانۋ مۇمكىندىگىن بولدىرماۋ ءۇشىن قوسارلانعان ماقساتتاعى تاۋارلاردىڭ 100 دەن استامىن رەسەيگە ەكسپورتتاۋدى دوعاردى. قازاقستان رەسەيگە، ۋكرايناعا نەمەسە جانجالعا قاتىسىپ جاتقان كەز كەلگەن وزگە تاراپقا قارۋ- جاراق ساتپايدى.
- بۇل ۇستانىم - ءبىزدىڭ بەيتاراپتىعىمىز بەن سىرتقى ساياساتىمىزدىڭ بەيبىت سۇيگىشتىگىنىڭ بولشەگى، - دەدى ول.
ونىڭ ايتۋىنشا، ەكىنشىدەن، رەسەي فەدەراتسياسىمەن قازىرگى تاۋار اينالىمى تەك بەيبىت، ازاماتتىق جانە گۋمانيتارلىق سيپاتتا عانا. ءسوز ازىق-تۇلىك، كەڭىنەن قولدانىلاتىن تاۋارلار، لوگيستيكا، ءبىلىم جانە مادەني جوبالار جايىندا عانا بولىپ وتىر.
- قازاقستان ە ا ە و مەن ت م د اياسىندا رەسەيدىڭ سەرىكتەسى بولىپ قالا بەرەدى. ءبىراق، گۋمانيتارلىق جانە اسكەري ىنتىماقتاستىقتىڭ ارا- جىگىن ناقتى شەكتەيدى. بۇل - الەۋمەتتىك جەلىلەردەگى ۇراندارعا ەمەس، ناقتىلانعان ءىس-قيمىلدارعا نەگىزدەلگەن رەسمي مەملەكەتتىك ۇستانىمنىڭ ءمانى.
ۇشىنشىدەن، قازاقستانعا قاتىستى ايىپتاۋلار رەسمي ورگانداردان ەمەس، انونيمدى Telegram-ارنالار مەن باياعىدان مەديالىق قىسىم مەن گيبريدتىك اسەر ەتۋدىڭ قۇرالىنا اينالعان جەكەلەگەن «اسكەري تىلشىلەر» تاراپىنان شىعىپ جاتىر. ولاردىڭ ماقساتى - قازاقستان مەن ونىڭ نەگىزگى سەرىكتەستەرى اراسىنا سىنا قاعۋ، استانانى حالىقارالىق قوعامداستىقتىڭ كوز الدىندا بەدەلىن ءتۇسىرۋ، قازاقستاننىڭ ەگەمەندىگى مەن سىرتقى ساياساتىنىڭ پراگماتيزمىنە كۇمان كەلتىرۋ، - دەپ اتاپ وتەدى ساياساتتانۋشى.
ەلىمىزدىڭ سىرتقى ىستەر مينيسترلىگىنىڭ رەاكسياسى بىردەن ءارى ءبىرجاقتى بولدى: مۇنداي مالىمدەمەلەردىڭ ەشقانداي نەگىزى جوق جانە ەل درونداردىڭ لوگيستيكاسىنا دا، سوققى جاساۋ وپەراتسياسى ءۇشىن قانداي دا جەتكىزىلىمدەرگە دە قاتىستى ەمەس.
ول قوعام مەن مەملەكەت اراسىندا سەنىمسىزدىك دانەگىن سەبۋگە تىرىسۋدى، دەسترۋكتيۆتى وسەك-اياڭ تاراتۋدى گيبريدتىك قىسىم ەلەمەنتتەرى دە اتادى.
- بۇعان قوعامنىڭ مىزعىماستىعى، اقپاراتتىق الاڭنىڭ كوزقاراقتىلىعى جانە ارانداتۋشىلىققا قاتاڭ تويتارىس بەرۋ جاۋاپ بولۋى ءتيىس. قازاقستان - وزگەنىڭ ويىنىندا قولدانىلاتىن قۇرال ەمەس.
سىرتقى ساياساتىمىز تاۋەلسىز، سىندارلى جانە تۇراقتى دامۋعا، قاۋىپسىزدىككە جانە حالىقارالىق لەگيتيمدىلىككە باعىتتالعان جانە دە بۇل - فەيكتەرمەن دە، سانالى ۋلاۋمەن دە جويۋ مۇمكىن ەمەس «قىزىل سىزىق»، - دەدى ءادىل سەيفۋللين.
اۆتور
مارلان جيەمباي
