كەلەسى جىلى جالپى ىشكى ءونىم ءوسىمى 5,6 پايىز بولادى - مينيسترلىك
استانا. قازاقپارات - 2025 -جىلى جالپى ىشكى ءونىمنىڭ ناقتى ءوسۋى 5,6 پايىزدى قۇرايدى. بۇل تۋرالى ماجىلىستە ۇلتتىق ەكونوميكا ۆيتسە-ءمينيسترى ازامات ءامرين ايتتى.
«سىزدەردىڭ قاراۋلارىڭىزعا ەلدىڭ 2025-2029 -جىلدارعا ارنالعان الەۋمەتتىك-ەكونوميكالىق دامۋ بولجامى جانە «قازاقستان رەسپۋبليكاسىنىڭ ۇلتتىق قورىنان 2025 - 2027 -جىلدارعا ارنالعان كەپىلدەندىرىلگەن ترانسفەرت تۋرالى» زاڭنىڭ جوباسى ەنگىزىلەدى. بولجامدى قالىپتاستىرۋدىڭ نەگىزىنە مۇنايدىڭ باعاسى باررەلىنە 75 ا ق ش دوللارى جانە دوللاردىڭ ەسەپتىك باعامى 470 تەڭگە بولعانداعى بازالىق سسەناريى الىندى. بولجام بويىنشا 2025 -جىلى جالپى ىشكى ءونىمنىڭ ناقتى ءوسۋى - 5,6 پايىزدى، 5 جىل ىشىندە جالپى ىشكى ءونىمنىڭ ورتاشا جىلدىق ءوسۋى 5,4 پايىزدى قۇرايدى. اتاۋلى جالپى ىشكى ءونىم 2025 -جىلعى 150,8 تريلليون تەڭگەدەن 2029 -جىلى 234,2 تريلليون تەڭگەگە دەيىن وسەدى»، - دەدى ۆيتسە-مينيستر.
ونىڭ اتاپ وتۋىنشە، ەكونوميكانىڭ بارلىق سالاسىندا ءوسىم كۇتىلەدى.
ماسەلەن، ونەركاسىپتەگى ورتاشا جىلدىق ءوسۋ قارقىنى - 4,1 پايىز، ونىڭ ىشىندە وڭدەۋ ونەركاسىبىندە - 5,8 پايىزدى، تاۋ-كەن ءوندىرۋ ونەركاسىبىندە 2,9 پايىزدى قۇرايدى.
اۋىل شارۋاشىلىعىنداعى ورتاشا جىلدىق ءوسىم - 5,3 پايىز، قۇرىلىستا - 9,3 پايىز، كولىك قىزمەتتەرىندە - 8,2 پايىز جانە ساۋدادا 7,1 پايىز بولادى.
«مۇناي ءوندىرۋ كولەمى 2025 -جىلى 97,2 ميلليون توننادان 2029 -جىلى 104,8 ميلليون تونناعا دەيىن ۇلعايادى. تاۋارلاردىڭ ەكسپورتى 2025 -جىلى 82,3 ميلليارد ا ق ش دوللاردان 2029 -جىلى 90,0 ميلليارد ا ق ش دوللارعا دەيىن وسەدى دەپ بولجانادى. يمپورت 61,3 ميلليارد ا ق ش دوللاردان 67,5 ميلليارد ا ق ش دوللارعا دەيىن وسەدى. ينفلياتسيا دەڭگەيى 2025 -جىلى 5,5 جانە 7,5 پايىز، 2026 -جىلى 5 جانە 6 پايىز ارالىعىندا ايقىندالدى، كەيىننەن 2027-2029 -جىلدارى 5 پايىزعا دەيىن تومەندەۋى كۇتىلەدى»، - دەدى ازامات ءامرين.
اۆتور
مارلان جيەمباي
