كەلەر جىلى ۇ ب ت- نىڭ جاڭا فورماتى ىسكە قوسىلادى

استانا. قازاقپارات - 2025 -جىلى ۇلتتىق ءبىرىڭعاي تەست تاپسىرۋدىڭ جاڭا فورماتى پيلوتتىق جوبا رەتىندە ىسكە قوسىلادى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ۇكىمەتتەگى بريفينگتە ءمالىم ەتتى.

مينيستر بۇگىندە كوپتەگەن ەلدەردە تەستىلەۋدى الىپ تاستاۋ تۋرالى قىزۋ پىكىرتالاس جۇرگىزىلىپ جاتقانىن اتاپ ءوتتى.

«ناقتى مىسال - ا ق ش، وندا پاندەميا كەزىندە ستاندارتتى تەستتەر الىنىپ تاستالدى جانە ۋنيۆەرسيتەتتەر وتە كۇردەلى ماسەلەگە تاپ بولدى. ورتالىقتاندىرىلماعان وقۋعا ءتۇسۋ جۇيەسىنە قاراماستان، كەم دەگەندە ستۋدەنتتەردى باعالاۋ، سالىستىرۋ جانە ىرىكتەۋ ءۇشىن قانداي دا ءبىر ستاندارت قاجەت»، - دەيدى ساياسات نۇربەك.

ونىڭ ايتۋىنشا، مينيسترلىك 2021 -جىلدان باستاپ دۇنيەجۇزىلىك بانكتىڭ قولداۋىمەن ۇ ب ت فورماتىن قايتا قۇرۋ جانە ەڭ باستىسى - تەست سۇراقتارىنىڭ مازمۇنىن تۇبەگەيلى قايتا وڭدەۋ بويىنشا ۇلكەن جوبانى ىسكە قوسقان.

«الدىڭعى جىلى ءبىز ەكى باعىت بويىنشا جۇمىس ىستەدىك. ءبىرىنشىسى - SIT سياقتى تۇبەگەيلى جاڭا فورمات بويىنشا تەستتەردى دايىنداۋ، بارلىق سۇراقتاردى مازمۇندى تۇردە قايتا قاراۋ كەرەك بولدى. وتكەن اپتادا بۇل كومپونەنت اياقتالدى. تەست دايىنداۋدى الەمگە ايگىلى فرانسۋز كومپانياسى جۇرگىزدى. جاڭا مودەل بويىنشا 350 تەستولوگ دايىندالدى» - دەدى مينيستر.

ەكىنشى باعىت - فين كومپانيالار توبىمەن مازمۇندى ءتاسىل بويىنشا جۇمىس.

«بۇل ارنايى وقىتىلعان تەستولوگتار توبى SIT فورماتىنا ۇقساس جاڭا ادىستەمە بويىنشا سۇراقتار دايىنداي باستايدى، بۇل حالىقارالىق دەڭگەيدە تانىلعان تەست. وعان قوسا، ءبىز بازانى قۇرعاندا جاڭا ۇ ب ت فورماتىن پيلوتتىق تۇردە باستاۋ ءۇشىن كەم دەگەندە 50 مىڭ سۇراق ازىرلەۋىمىز كەرەك بولادى. مۇندا وتە مۇقيات، ۇقىپتى بولۋىمىز كەرەك، ويتكەنى فورماتتىڭ كۇرت وزگەرۋى دە ۇلكەن پروبلەمالارعا الىپ كەلەدى، جوعارى سىنىپ وقۋشىلارىن وسى فورماتقا دايىنداۋ قاجەت»، - دەپ اتاپ ءوتتى س. نۇربەك.

ۆەدومستۆو باسشىسى وسى جىلدان باستاپ مينيسترلىك ۇلكەن پيلوتتىق جوباعا دايىندىقتى باستايتىنىن ايتتى.

«ءبىز پيلوتتىق جوبانى كەلەسى جىلى باستايمىز، جوبا ۇ ب ت فورماتىن بىردەن وزگەرتپەيدى، بەلگىلى ءبىر پيلوتتىق رەجيمدە ىسكە قوسىلادى. بىرتە-بىرتە ءبىز SIT حالىقارالىق ستاندارتىنا كوشەمىز، وندا ءاربىر تالاپكەردىڭ ءوزى تەستىلەۋ ورنىن، ۋاقىتىن تاڭدايدى، دايىندالادى، تاپسىرادى، سەرتيفيكات الادى، سونىمەن وقۋعا تۇسەدى»، - دەدى مينيستر.

اۆتور

ايجان سەرىكجان قىزى