كۇدىكتى قۇرىلىس كومپانياسى تۇرعىنداردان ءالى اقشا جيناپ جاتىر: پوليتسيا ەل تۇرعىندارىنا ۇندەۋ جاسادى

استانا. KAZINFORM - الاياقتىققا كۇدىكتى قۇرىلىسشى ازاماتتاردان زاڭسىز اقشا جيناۋدى ءالى دە جالعاستىرىپ جاتىر. ءتارتىپ ساقشىلارى قازاقستاندىقتارعا ۇندەۋ جاسادى، دەپ حابارلايدى Polisia.kz.

«Ayana Plaza» تۇرعىن ءۇي كەشەنى قۇرىلىسىنىڭ توقتاتىلعانىنا قاراماستان، قۇرىلىس سالۋشى پاتەر ساتۋ سىلتاۋىمەن ازاماتتاردىڭ قاراجاتىن زاڭسىز الۋدى جالعاستىرىپ جاتىر.

ەلوردا پوليتسياسى «Ayana Plaza» تۇرعىن ءۇي كەشەنى قۇرىلىسىنا ارنالعان ۇلەسكەرلەردىڭ اقشا قاراجاتىن الداپ الۋ جولىمەن يەمدەندى دەپ «Kaztelematica» ج ش س، «Kaztelematica group» ج ش س جانە «Building Company» ج ش س باسشىلارىنا قاتىستى الاياقتىق فاكتىسى بويىنشا قىلمىستىق ءىستى تەرگەپ جاتىر.

قازىرگى ۋاقىتتا پوليتسياعا 110 جابىرلەنۋشى ارىزدانعان، ءبىراق سوتقا دەيىنگى تەرگەپ-تەكسەرۋ بارىسىندا زارداپ شەككەندەردىڭ سانى الدەقايدا كوپ ەكەنى انىقتالدى.

«الدانعان ۇلەسكەرلەردىڭ جاڭا تولقىنىنىڭ پايدا بولۋىنا جول بەرمەۋ ءۇشىن جوعارىدا اتالعان تۇرعىن ءۇي كەشەنىنىڭ قۇرىلىسىنا اقشا سالماۋدى ۇسىنامىز. اتالعان كومپانيالار باسشىلارىنىڭ ارەكەتىنەن زارداپ شەككەن ازاماتتاردان استانا قالاسى پوليتسيا دەپارتامەنتىنە سەيفۋللين كوشەسى، 37 مەكەنجايى بويىنشا جۇگىنۋىڭىزدى سۇرايمىز»، - دەلىنگەن حابارلامادا.

اۆتور

ايدار وسپاناليەۆ