كاسپي قۇبىرى كونسورتسيۋمىنا جاسالعان درون شابۋىلى: شىعىندى كىم وتەيدى

استانا. KAZINFORM - كاسپي قۇبىرى كونسورتسيۋمىنا كەلگەن شىعىن كاسىپورىننىڭ ءوز ەسەبىنەن وتەلىپ جاتىر. بۇل تۋرالى ەنەرگەتيكا ءمينيسترى الماسادام ساتقاليەۆ ءمالىم ەتتى.

- ديپلوماتيالىق ارنا ارقىلى قالپىنا كەلتىرۋ ماسەلەلەرى بويىنشا كونسۋلتاتسيا جۇرگىزىلدى. قازىرگى ۋاقىتتا شىعىندى وتەۋ جۇمىستارى كاسىپورىننىڭ ءوز ەسەبىنەن جۇرگىزىلىپ جاتىر، - دەدى الماسادام ساتقاليەۆ ۆەدومستۆونىڭ كەڭەيتىلگەن القا وتىرىسىنان كەيىن وتكەن باسپا ءسوز ءماسليحاتىندا.

سونداي-اق مينيستر كونسۋلتاتسيالىق جۇمىسقا، ياعني ك ق ك- عا كەلگەن شىعىندى انىقتاۋعا قازاقستاندىق مامانداردىڭ دا قاتىسقانىن ايتتى.

- جالپى، كاسىپورىننىڭ زاقىمدانۋى تۋرالى ەسەپ ۇسىنىلدى، ول قازاقستاندىق تاراپ جانە اكسيونەرلەرمەن كەلىسىلدى. ك ق ك- نىڭ تۇراقتى جۇمىسىن قامتاماسىز ەتۋ ءۇشىن شامامەن 1 ميلليون توننا مۇناي ساقتايتىن ءىرى رەزەرۆۋار بار. بۇگىندە قازاقستاندىق مۇنايدى قابىلداۋ شەكتەۋسىز ءجۇرىپ جاتىر، ول ءۇشىن ءبىرقاتار شەشىم قابىلداندى. جۇك تيەۋ بەلگىلەنگەن ۋاقىتتا، ال تانكەرلەردى تولتىرۋ بەكىتىلگەن كەستە بويىنشا جۇزەگە اسىرىلىپ جاتىر، - دەيدى ول.

بۇعان دەيىن قازاقستاننىڭ سىرتقى ىستەر مينيسترلىگى كاسپي قۇبىر كونسورتسيۋمىنىڭ مۇناي ايداۋ ستانساسىنا جاسالعان درون شابۋىلىنا قاتىستى ۋكراينامەن تالقىلاناتىنى تۋرالى مالىمدەگەن ەدى.

ايتا كەتسەك، 17- اقپاندا كاسپي قۇبىرى كونسورتسيۋمىنا درونمەن شابۋىل جاسالدى.

اۆتور

داۋلەت ىزتىلەۋ