كاسپي قۇبىر كونسورتسيۋمى ارقىلى مۇناي ايداۋ كولەمى 81,5 ميلليون تونناعا دەيىن ارتادى
استانا. KAZINFORM – ق ر پرەمەر-ءمينيسترى ولجاس بەكتەنوۆ پەن كاسپي قۇبىر كونسورتسيۋمىنىڭ باس ديرەكتورى نيكولاي گوربان مۇناي تاسىمالى سالاسىنداعى ارىپتەستىك ماسەلەلەرى بويىنشا كەزدەسۋ وتكىزدى، دەپ حابارلايدى ۇكىمەتتىڭ باسپا ءسوز قىزمەتى.
وندا قازىر جۇزەگە اسىپ جاتقان جانە پەرسپەكتيۆالى ينۆەستيتسيالىق باعدارلامالاردىڭ ورىندالۋ بارىسى جانە «تەڭىز- نوۆوروسسيسك» مۇناي قۇبىرىن جاڭعىرتۋ قارقىنى قارالدى.
حالىقارالىق كونسورتسيۋم باسشىسى 2024 -جىلدىڭ قورىتىندىسى تۋرالى اقپارات بەردى.
نيكولاي گوربان «كروپوتكينسكايا» مۇناي ايداۋ ستانساسىندا قالپىنا كەلتىرۋ جۇمىستارىنىڭ اياقتالعانى جانە ىسكە قوسىلعانى تۋرالى باياندادى. «قازترانسويل» ا ق مەن ك ق ك ارىپتەستىگى اياسىندا 2024 -جىلى ك ق ك مۇناي قۇبىرى جەلىسى مەن «قازترانسويل» ا ق- نىڭ ت. قاسىموۆ اتىنداعى مۇناي ايداۋ ستانساسىن بايلانىستىراتىن جاڭا قۇبىر قۇرىلىسى جانە ونى ىسكە قوسۋ جوباسى جۇزەگە اسىرىلدى.
- بۇگىندە ايداۋ كولەمىن جىلىنا 67 ميلليون توننادان 81,5 ميلليون تونناعا دەيىن، ونىڭ ىشىندە قازاقستاندىق ۋچاسكە بويىنشا جىلىنا 53,7 ميلليون توننادان 72,5 ميلليون تونناعا دەيىن ارتتىرۋعا تەحنيكالىق مۇمكىندىك قامتاماسىز ەتىلدى. ك ق ك مۇناي قۇبىرىنىڭ «تار» تۇستارىن جويۋ جوباسىن ىسكە اسىرۋ ناتيجەسىندە بيىلعى قازان ايىندا مۇناي جونەلتۋ كولەمىن 1 ميلليون تونناعا دەيىن جەتكىزۋ جوسپارلانىپ وتىر، - دەلىنگەن حابارلامادا.
ولجاس بەكتەنوۆ ۇكىمەت ك ق ك مۇناي قۇبىرىنىڭ ۇزدىكسىز جۇمىس ىستەۋى ماسەلەسىنە ەرەكشە نازار اۋدارىپ وتىرعانىن باسا ايتتى. جۇيە قازاقستاندىق مۇناي ەكسپورتى بويىنشا ماڭىزدى ارتەريا سانالادى. وسىعان بايلانىستى قازاقستاندىق تاراپ قاجەتتى قولداۋ كورسەتەدى.
كەزدەسۋ بارىسىندا كونسورتسيۋمنىڭ الەۋمەتتىك جاۋاپكەرشىلىگىنىڭ ماڭىزدىلىعى اتاپ ءوتىلدى. ك ق ك قازاقستاندا ءبىرقاتار الەۋمەتتىك جوبانى ىسكە اسىرۋدا، ونىڭ ىشىندە اتىراۋ قالاسىندا 900 ورىندىق مەكتەپ سالىپ جاتىر. وتكەن جىلى الەۋمەتتىك جوبالارعا بارلىعى 4,4 ميلليارد تەڭگە ءبولىندى. 2025 -جىلى ءبىلىم بەرۋ جانە مەديتسينالىق ينفراقۇرىلىمدى دامىتۋعا ىقپال ەتەتىن شارالار جوسپارلانىپ وتىر.
كەلىسسوزدەر قورىتىندىسى بويىنشا تاراپتار ءوزارا ءىس-قيمىل باعىتتارى بويىنشا ىنتىماقتاستىقتى نىعايتۋ نيەتتەرىن جەتكىزدى.
