جولداردا ساپالى ۇيالى بايلانىس پەن موبيلدى ينتەرنەت بولۋى ءتيىس - ۇكىمەت باسشىسى
استانا. KAZINFORM - رەسپۋبليكالىق جانە نەگىزگى وبلىستىق جولداردا ساپالى ۇيالى بايلانىس پەن موبيلدى ينتەرنەت بولۋى ءتيىس. بۇل تۋرالى پرەمەر-مينيستر ولجاس بەكتەنوۆ ايتتى.
«جىلدام ينتەرنەت سيفرلاندىرۋدىڭ نەگىزى سانالادى. وسى رەتتە ساپالى بايلانىسپەن قامتاماسىز ەتۋ ماسەلەسى - ستراتەگيالىق ماڭىزى بار مىندەت. ونى شەشۋ ءۇشىن وتكەن جىلى «قولجەتىمدى ينتەرنەت» ۇلتتىق جوباسى قابىلداندى. ەندى وسىنى ۋاقتىلى ىسكە اسىرۋ -سيفرلىق دامۋ مينيسترلىگىنىڭ مىندەتى. بارلىق ءىس-شارانى ورىنداۋ ناتيجەسىندە 2027 -جىلعا قاراي ەلدى مەكەندەر مەن جولداردى بايلانىس جەلىلەرىمەن قامتۋ 100 پايىزعا جەتەدى. وسى ورايدا تۇرعىندار جىلدام، 100 مبيت/سەكۋندتان كەم بولمايتىن ينتەرنەتپەن قامتاماسىز ەتىلۋى كەرەك»، - دەدى ۇكىمەت باسشىسى.
پرەمەر- مينيستر رەسپۋبليكالىق جانە نەگىزگى وبلىستىق جولداردا ساپالى ۇيالى بايلانىس پەن موبيلدى ينتەرنەت بولۋى ءتيىس ەكەنىن باسا ايتتى.
«بايلانىستىڭ بۇل ءتۇرى ادامداردىڭ سويلەسۋ نەمەسە اقپارات الۋ مۇمكىندىگى عانا ەمەس. ول سونداي-اق جاڭا سەرۆيستەر، مەملەكەتتىك جانە قارجىلىق قىزمەتتەر ۇسىنۋ، جاڭا بيزنەس تۇرلەرىنىڭ قالىپتاسۋى ەكەنىن ايتا كەتكەن ءجون. سوندىقتان بايلانىس قىزمەتتەرىنىڭ كولەمىن ارتتىرۋ ەكونوميكالىق ءوسۋدىڭ ماڭىزدى اسپەكتىلەرىنىڭ ءبىرى ەكەنى بەلگىلى. ەگەر كورسەتىلەتىن قىزمەتتەر مەن سەرۆيستەرگە ونلاين ءارى جىلدام قول جەتكىزۋ بولماسا، تەحنولوگيالىق جاعىنان ەڭ وزىق جوبالاردىڭ وزىنەن مەملەكەت قاجەتتى اسەر الا المايدى»، - دەدى ولجاس بەكتەنوۆ.
اۆتور
مارلان جيەمباي
