جوعارى دەڭگەيدە وڭدەلگەن تاۋارلاردىڭ ەكسپورتىن ۇلعايتۋ قاجەت - پرەمەر-مينيستر
استانا. قازاقپارات - 2025 -جىلى وڭدەلگەن ونىمدەر مەن قىزمەتتەر ەكسپورتىنىڭ كولەمىن 41 ميلليارد دوللارعا دەيىن جەتكىزۋ قاجەت. بۇل تۋرالى ۇكىمەت وتىرىسىندا قازاقستان پرەمەر- ءمينيسترى ولجاس بەكتەنوۆ ايتتى.
«ەكونوميكانى ءارتاراپتاندىرۋ ماسەلەسى ءبىرىنشى كەزەكتە شيكىزاتتىق ەمەس ەكسپورت كولەمىن ارتتىرۋعا تىكەلەي بايلانىستى. بىلتىر ەكسپورتتىڭ وڭ ءوسىمى تىركەلدى. نىسانالى ينديكاتور 3 پايىزعا اسىرا ورىندالدى. بيىل ودان دا جوعارى كورسەتكىشتى، ياعني ەكسپورت دەڭگەيىن 37,7 ميلليارد دوللارعا دەيىن قامتاماسىز ەتۋ مىندەتى تۇر. ال 2025- جىلدىڭ قورىتىندىسى بويىنشا وڭدەلگەن ونىمدەر مەن قىزمەتتەر ەكسپورتىنىڭ كولەمىن 41 ميلليارد دوللارعا دەيىن جەتكىزۋ قاجەت. سونىمەن قاتار ءبىز بۇدان دا بيىك ماقساتتار قويىپ، اتالعان جوسپارلاردى اسىرا ورىنداۋعا تىرىسۋىمىز كەرەك»، - دەدى و. بەكتەنوۆ.
بۇل تۇرعىدا ول وسى جۇمىسقا بارلىق مۇددەلى مينيسترلىكتەر، اكىمدىكتەر، اسىرەسە بيزنەس بەلسەندى اتسالىسۋى ءتيىس ەكەنىن ايتتى.
«شيكىزاتتىق ەمەس ەكسپورتتى دامىتۋدا جوعارى دەڭگەيدە وڭدەلگەن تاۋارلار ەكسپورتىنا باسا ءمان بەرۋىمىز كەرەك. ەگەر مۇقيات قارايتىن بولساق، قىزمەت كورسەتۋ ەكسپورتىنىڭ كولەمى ورنىقتى ءوسىپ كەلەدى - بىلتىر شامامەن 30 پايىزعا ءوستى، ال شيكىزاتتىق ەمەس تاۋارلاردىڭ ەكسپورتى بىلتىر كەرىسىنشە 5,7 پايىزعا تومەندەپ كەتكەن. تاۋارلاردىڭ يمپورتى 21,5 پايىزعا ارتقان. كورىپ وتىرعانداي، ايىرماشىلىق 2 ەسەدەن اسادى، بۇل ساۋدا بالانسىنا تەرىس اسەر ەتەدى. سوندىقتان جوعارى دەڭگەيدە وڭدەلگەن تاۋارلاردىڭ ءوندىرىسى مەن ەكسپورتىن ۇلعايتۋ قاجەت. ول ءۇشىن پەرسپەكتيۆا مەن مۇمكىندىك جەتكىلىكتى»، - دەدى ۇكىمەت باسشىسى.
پرەمەر- مينيستر وتاندىق وندىرۋشىلەر مەن ەكسپورتتاۋشىلارعا بەلسەندى قولداۋ جاساۋدى تاپسىردى.
«ساقتاندىرۋ، قارجىلىق، سەرۆيستىك سياقتى قولداۋ قۇرالدارىنىڭ 20-دان استام ءتۇرى بار. ولاردى ءتيىمدى پايدالانىپ، بيزنەس- قوعامداستىققا وسى شارالار تۋرالى ۇنەمى اقپارات جەتكىزىپ تۇرۋ قاجەت. كونسۋلتاتسيالىق قىزمەتتەر كورسەتۋ، اقپاراتتىق سۇيەمەلدەۋ جانە جاڭا نارىقتارعا شىعۋعا كومەكتەسۋ ارقىلى ەكسپورتقا باعدارلانعان كاسىپورىنداردى قولداۋدى كۇشەيتۋ قاجەت»، - دەدى و. بەكتەنوۆ.
اۆتور
رۋسلان عابباسوۆ
