جوعارعى سوت وقۋشىنىڭ مەكتەپكە ورامال تاعۋىنا سالىنعان تىيىمنىڭ كۇشىن جويدى

استانا. KAZINFORM - قازاقستاندىق زاڭگەر جاسلان ايماعانبەتوۆ وقۋشى قىزدىڭ ورامال تاققانى ءۇشىن مەكتەپ قابىرعاسىندا ءبىلىم الۋىنا شەكتەۋ قويۋ ماسەلەسىن كوتەرىپ، جوعارعى سوتقا جۇگىنگەن. وسى ءىس بويىنشا شەشىم قابىلداندى.

«جوعارعى سوت وقۋشى قىزداردىڭ ورامال تاققانى ءۇشىن مەكتەپتە ءبىلىم الۋىنا شەكتەۋ قويۋ ماسەلەسىنە نۇكتە قويدى. جوعارعى سوت وسى شەشىمىمەن وبلىستىق سوت قاۋلىسىنىڭ كۇشىن جويىپ، تىيىم بالالاردىڭ ءبىلىم الۋ قۇقىعىن بۇزاتىنىن مويىندادى. مۇنداي شەشىمدى بۇعان دەيىن 4 وبلىستاعى سوتتار دا مويىنداعان ەدى. قالاي بولعاندا دا، سوت بيلىگى مينيسترلىكتىڭ ۇستانىمىنا ەمەس، زاڭ نورمالارىنا قارايتىنى قۋانتادى»، - دەگەن جازبا جاريالادى جاسلان ايماعانبەتوۆ الەۋمەتتىك جەلىدەگى پاراقشاسىندا.

وسى ورايدا ءىستىڭ ءمان-جايىن جوعارعى سوتتان سۇراپ بىلدىك. ۆەدومستۆو بۇل مالىمەتتى راستادى.

«شەشىم قابىلداندى، 10 جۇمىس كۇنى ىشىندە قاۋلى شىعادى»، - دەلىنگەن جوعارعى سوتتىڭ اكىمشىلىك ىستەر جونىندەگى سوت القاسى حاتشىلىعى تاراتقان اقپاراتتا.

ايتا كەتسەك، مەكتەپتەردە حيدجاب كيۋگە رۇقسات بەرۋ ماسەلەسى ەلىمىزدە بىرنەشە جىلدان بەرى تالقىلانىپ كەلەدى.

بۇعان دەيىن وقۋ-اعارتۋ ءمينيسترى عاني بەيسەمبايەۆ وقۋشىلاردىڭ مەكتەپكە حيدجابپەن كەلۋىنە قاتىستى بىلاي دەگەن ەدى:

«كونستيتۋتسيا بويىنشا قازاقستان - زايىرلى مەملەكەت. مەكتەپ تە زايىرلى بولىپ سانالادى. 2016-جىلى بەكىتىلگەن وقۋشىلاردىڭ مەكتەپ فورماسى مەن كيىمىنە قاتىستى بۇيرىق بار. ول وزگەرگەن جوق. سوندىقتان بالالار ءبىلىم ورداسىنا مەكتەپ فورماسىمەن كەلۋى كەرەك».

اۆتور

داۋلەت ىزتىلەۋ