جەتىم بالالارعا ارنالعان جاڭا تالىمگەرلىك ينستيتۋتى ەنگىزىلەدى - اسحات ايماعامبەتوۆ

قازاقستاندا جەتىم بالالاردىڭ تاربيەسىنە ارنالعان تالىمگەرلىك ينستيتۋتى ەنگىزىلەدى. بۇل تۋرالى ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءبىلىم بەرۋ جانە تالىمگەرلىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ كەزىندە دەپۋتات اسحات ايماعامبەتوۆ ءمالىم ەتتى، دەپ حابارلايدى Kazinform.

«جەتىم بالالار ءۇشىن جاڭا تالىمگەرلىك ينستيتۋتىن ەنگىزۋ بويىنشا نورما ۇسىنىلىپ وتىر. ول نە ءۇشىن كەرەك؟ بۇل ينستيتۋت 10 جاستان اسقان، بالالار ۇيلەرىندە تاربيەلەنەتىن جەتىم بالالاردى الەۋمەتتەندىرۋگە جانە ءومىر ءسۇرۋ جاعدايلارىنا بەيىمدەۋگە قوسىمشا مۇمكىندىك بەرەدى. تالىمگەرلەر ۆولونتەرلىك تارتىپتە، ياعني اقىسىز تۇردە بالالار ۇيىندەگى جەتكىنشەكتەردى قامقورلىعىنا الىپ، ولارعا قولداۋ كورسەتۋگە، الەۋمەتتەندىرۋ جۇمىسىن جۇرگىزۋگە مۇمكىندىك الادى»، - دەدى ا. ايماعامبەتوۆ.

ايتۋىنشا، تالىمگەرگە قاتىستى، ولاردى باقىلاۋعا، جاۋاپكەرشىلىگى بويىنشا ناقتى ءارى قاتاڭ تالاپتار قاراستىرىلدى. بالالار ءۇيى، ءبىلىم باسقارماسى مەن تالىمگەر اراسىندا بارلىق قارىم قاتىناستار شارتپەن رەتتەلەدى.

«زاڭ جوباسىندا پوليتسيادا ديەۆيانتتى مىنەز قۇلىق بويىنشا تىركەۋدە تۇرعان بالالاردى قولداۋ جانە وڭالتۋ بويىنشا ارنايى نورما ۇسىنىلدى. باستى ماسەلە وسى ساناتتاعى بالالاردىڭ بوس ۋاقىتىن قامتۋ. وسىعان وراي، ەندى وسى وقۋشىلار پرواكتيۆتى فورماتتا، ياعني ەشقايدا بارىپ ءوتىنىش بەرمەي- اق، ءتۇرلى ۇيىرمەلەرمەن جانە سەكتسيالارمەن قامتىلاتىن بولادى. ءبىلىم بەرۋ ۇيىمدارىندا ءدىني جانە باسقا دا زياندى اقپاراتقا جول بەرمەۋ تۋرالى ناقتى مىندەت بەكىتىلدى»، - دەدى دەپۋتات.

اۆتور

رۋسلان عابباسوۆ