جۇرگىزۋشى كۋالىگىن الاتىندار مەديتسينالىق انىقتاماسىن قاعاز تۇرىندە تاپسىرمايتىن بولدى
استانا. KAZINFORM - مەملەكەتتىك كورپوراتسيا جۇرگىزۋشى كۋالىگىن الۋ كەزىندە 073/ە مەديتسينالىق انىقتاماسىن اۆتوماتتى تۇردە تەكسەرۋدى ەنگىزدى. بۇل تۋرالى «ازاماتتارعا ارنالعان ۇكىمەت» مەملەكەتتىك كورپوراتسياسى ءمالىم ەتتى.
«ازاماتتارعا ارنالعان ۇكىمەت» مەملەكەتتىك كورپوراتسياسى حالىققا قىزمەت كورسەتۋ ورتالىقتارىنىڭ اقپاراتتىق جۇيەسىن ق ر دەنساۋلىق ساقتاۋ مينيسترلىگىنىڭ اقپاراتتىق جۇيەسىمەن بىرىكتىردى. ەندى جۇرگىزۋشى كۋالىگىن الۋ كەزىندە 073/ە ۇلگىسىندەگى جالعان مەديتسينالىق انىقتاما ۇسىنۋ تيىلماق.
- ەندى ازاماتتارعا «جۇرگىزۋشى كۋالىگىن بەرۋ» مەملەكەتتىك قىزمەتىن الۋ كەزىندە مەديتسينالىق انىقتامانى قاعاز تۇرىندە تاپسىرۋدىڭ قاجەتى جوق. مەديتسينالىق تەكسەرۋدىڭ ناتيجەسى اۆتوماتتى تۇردە ي ا ج ح ق ك و- عا كەلىپ تۇسەدى. بۇل جاڭاشىلدىق وتىنىشتەردىڭ قاراۋ مەرزىمىن جەدەلدەتۋگە، جالعان قۇجاتتاردى ۇسىنۋ جاعدايلارىن بولدىرماۋعا جانە جۇرگىزۋشى كۋالىگىن الۋ ءراسىمىنىڭ اشىقتىعىن ارتتىرۋعا مۇمكىندىك بەرەدى، - دەلىنگەن حابارلامادا.
اتالعان باستاما اۋقىمدى سيفرلىق ترانسفورماتسيانىڭ ءبىر بولىگىنە اينالدى جانە بۇل مەملەكەتتىك ورگاندار اراسىنداعى ءوزارا ءىس-قيمىلدى وڭتايلاندىرۋ ارقىلى مەملەكەتتىك قىزمەتتەردىڭ ساپاسى مەن قولجەتىمدىلىگىن ارتتىرۋعا باعىتتالعان.
ايتا كەتۋ كەرەك، جۇرگىزۋشى كۋالىگىنىڭ قولدانىلۋ مەرزىمى اياقتالماي تۇرىپ اۋىستىرىلعان جاعدايدا، مەديتسينالىق تەكسەرۋدەن ءوتۋ تالاپ ەتىلمەيدى. سونداي-اق، پسيحونيەۆرولوگيالىق جانە ناركولوگيالىق ديسپانسەرلەردەن انىقتاما ۇسىنۋ قاجەتتىلىگى جوق.
ەسكە سالا كەتەيىك، بۇعان دەيىن مامانداندىرىلعان حالىققا قىزمەت كورسەتۋ ورتالىعىندا وتكىزىلەتىن تەوريالىق جانە تاجىريبەلىك ەمتيحانعا ەندى تەك «ح ق ك و» قوسىمشاسى ارقىلى عانا جازىلۋعا بولاتىنىن جازعان ەدىك.
