جەر كوميسسياسى مەملەكەتكە 12,8 ميلليون گەكتار جەردى قايتاردى
استانا. KAZINFORM - مەملەكەتكە قايتارىلعان جەرلەر شارۋالارعا جايىلىمعا بەرىلىپ جاتىر جانە كونكۋرستىق نەگىزدە جالعا بەرىلەدى. پايدالانباي جاتقان جەردى مەملەكەتكە قايتارۋ جانە قايتا ءبولۋ ماسەلەسى تۋرالى اۋىل شارۋاشىلىعى مينيسترلىگىنە ساۋال جولداعان ەدىك.
مەملەكەت باسشىسىنىڭ تاپسىرماسىنا سايكەس 2022 -جىلعى 28- ساۋىردە پايدالانىلمايتىن جانە زاڭنامانى بۇزا وتىرىپ بەرىلگەن جەرلەردى الىپ قويۋ جونىندەگى تۇراقتى نەگىزدە جۇمىس ىستەيتىن كوميسسيا قۇرىلدى. كوميسسيا قۇرىلعان ساتتەن باستاپ بارلىق وبلىستا مۇددەلى قۇقىق قورعاۋ جانە مەملەكەتتىك ورگانداردىڭ قىزمەتكەرلەرىن تارتا وتىرىپ، ۆەدومستۆوارالىق توپتار ىسكە كىرىستى.
جالپى كوميسسيا قۇرىلعان ساتتەن باستاپ قازىرگى ۋاقىتقا دەيىن مەملەكەتكە 12,8 ميلليون گ ا جەر قايتارىلدى.
2022 -جىلى - 5,4 ميلليون گ ا
2023 -جىلى - 4,6 ميلليون گ ا
2024 -جىلى - 2,2 ميلليون گ ا
2025 -جىلى - 586,9 مىڭ گ ا.
2022-2024 -جىلدارى زاڭسىز پايدالانۋعا بەرىلگەن جانە پايدالانباي جاتقان جەردى مەملەكەتكە قايتارۋ بويىنشا كوش باستاپ تۇرعان وڭىرلەر:
قاراعاندى (1,9 ميلليون گ ا)
اقتوبە (1,1 ميلليون گ ا)
قوستاناي (1,06 ميلليون گ ا).
جەر قانداي جاعدايدا مەملەكەتكە اۆتوماتتى تۇردە قايتارىلادى؟
قازاقستان رەسپۋبليكاسى جەر كودەكسىنىڭ 81-بابىنا سايكەس جەر ۋچاسكەسىنە جەكە مەنشىك قۇقىعى نەمەسە جەر پايدالانۋ قۇقىعى:
مەنشىك يەسى - جەر ۋچاسكەسىن نەمەسە جەر پايدالانۋشى جەر پايدالانۋ قۇقىعىن يەلىكتەن شىعارىپ باسقا تۇلعالارعا بەرگەن جاعدايدا؛
مەنشىك يەسى مەنشىك قۇقىعىنان نەمەسە جەر پايدالانۋشى جەر پايدالانۋ قۇقىعىنان باس تارتقان جاعدايدا؛
جەر ۋچاسكەسىنە مەنشىك قۇقىعىنان نەمەسە جەر پايدالانۋ قۇقىعىنان قازاقستان رەسپۋبليكاسىنىڭ زاڭ اكتىلەرىندە كوزدەلگەن وزگە دە جاعدايلاردا ايىرىلعان رەتتە توقتاتىلادى.
سونداي- اق جەر پايدالانۋ كەلەسى جاعدايدا توقتاتىلۋى مۇمكىن:
ۋچاسكە بەرىلگەن مەرزىمنىڭ ءوتۋى؛
جەر ۋچاسكەسى كەپىلدە تۇرعان جاعدايلاردى قوسپاعاندا، جەر ۋچاسكەسىن جالعا بەرۋ شارتىنىڭ نەمەسە وتەۋسىز ۋاقىتشا جەر پايدالانۋ شارتىنىڭ مەرزىمىنەن بۇرىن توقتاتىلۋى؛
جەر پايدالانۋشىعا قىزمەتتىك جەر تەلىمىن بەرۋمەن بايلانىستى تۋىنداعان ەڭبەك قاتىناستارىنىڭ توقتاتىلۋى (جەر كودەكسىنىڭ 41-بابى)؛
جەر پايدالانۋدىڭ باستاپقى بەس جىل مەرزىمى ىشىندە قازاقستان رەسپۋبليكاسىنىڭ ۇكىمەتى ايقىنداعان وڭىرلەردەن تۇراقتى تۇرعىلىقتى جەرىن اۋىستىرۋى.
- جايىلىم تاپشىلىعى ماسەلەسىنىڭ وزەكتىلىگىن ەسكەرە وتىرىپ، ءبىرىنشى كەزەكتە مەملەكەتتىك مەنشىككە قايتارىلعان جەرلەر جايىلىمعا اۋىلدارعا بەرىلىپ جاتىر. مەملەكەتكە قايتارىلعان جەر ۋچاسكەلەرى حالىقتى ورتاق پايدالانىلاتىن جەرلەرمەن قامتاماسىز ەتكەننەن كەيىن عانا كونكۋرسقا شىعارىلادى، - دەگەن جاۋاپ الدىق مينيسترلىكتەن.
جەرگىلىكتى اتقارۋشى ورگانداردىڭ مالىمەتىنە سايكەس 2022 -جىلدان باستاپ مەملەكەت مەنشىگىنە قايتارىلعان جەرلەردىڭ 5,3 ميلليون گ ا جەرگىلىكتى حالىققا قايتا بەرىلدى. اتاپ ايتقاندا، اۋىل تۇرعىندارى ءۇشىن مال جايۋعا 2 ميلليون گەكتار جەر ءبولىندى، قالعان 3,3 ميلليون گ ا جەر ۋچاسكەسى كونكۋرستىق نەگىزدە قايتا پايدالانۋعا بەرىلدى.
پرەمەر-ءمينيستردىڭ ورىنباسارى - اۋىل شارۋاشىلىعى ءمينيسترىنىڭ 2018 -جىلعى 20 -جەلتوقسانداعى №518 بۇيرىعىمەن بەكىتىلگەن شارۋا نەمەسە فەرمەر قوجالىعىن، اۋىل شارۋاشىلىعىمەن اينالىسۋى ءۇشىن جەردى پايدالانۋ (جالعا الۋ) قۇقىعىن بەرۋ جونىندەگى كونكۋرستى ۇيىمداستىرۋ مەن وتكىزۋ قاعيدالارىنىڭ 23-تارماعىنا سايكەس اۋداندا، قالادا، اۋىلدا، كەنتتە كەمىندە 5 جىل تۇراتىن ادامدارعا ولاردىڭ كونكۋرستىق ۇسىنىستارىنا قوسىمشا 10 بال بەرۋ تۇرىندە ارتىقشىلىق بەرىلەدى.
جەردى ماقساتسىز پايدالانعان جاعدايدا قانداي جاۋاپكەرشىلىك بار؟
اكىمشىلىك قۇقىق بۇزۋشىلىق تۋرالى كودەكستىڭ 339-بابىنا سايكەس جەر ۋچاسكەلەرى مەنشىك يەلەرىنىڭ جانە جەر پايدالانۋشىلاردىڭ جەردى نىسانالى ماقساتىنا ساي ەمەس، اۋىلداردا فۋنكتسيونالدىق ايماققا سايكەس ەمەس پايدالانۋ جونىندەگى مىندەتتەردى ورىنداماسا ەسكەرتۋ جاسالادى.
زاڭ بۇزۋشىلىق انىقتالعان كەزدە، جەكە تۇلعالارعا - 5 شاعىن كاسىپكەرلىك سۋبەكتىلەرىنە نەمەسە كوممەرتسيالىق ەمەس ۇيىمدارعا - 10، ورتا كاسىپكەرلىك سۋبەكتىلەرىنە - 20، ءىرى كاسىپكەرلىك سۋبەكتىلەرىنە 50 ايلىق ەسەپتىك كورسەتكىش مولشەرىندە ايىپپۇل سالۋعا اكەپ سوعادى.
اكىمشىلىك جازا قولدانىلعاننان كەيىن 1 جىل ىشىندە قايتالانعان جاعدايدا، جەكە تۇلعالارعا - 10، شاعىن كاسىپكەرلىك سۋبەكتىلەرىنە نەمەسە كوممەرتسيالىق ەمەس ۇيىمدارعا - 20، ورتا كاسىپكەرلىك سۋبەكتىلەرىنە - 30، ىرى كاسىپكەرلىك سۋبەكتىلەرىنە 60 ايلىق ەسەپتىك كورسەتكىش مولشەرىندە ايىپپۇل سالىنادى.
ايتا كەتسەك، ساۋىردە اباي وبلىسىندا 64,2 مىڭ گەكتار پايدالانىلماعان جەر مەملەكەت مەنشىگىنە قايتارىلدى.
سونداي-اق قىزىلوردادا مەملەكەت مەنشىگىنە وتكەن جەر شارۋالارعا بەرىلىپ جاتقانىن جازعان بولاتىنبىز.
ەسكە سالساق، بىلتىر جەر رەسۋرستارىن باسقارۋ جونىندەگى كوميتەت جۇرگىزگەن تەكسەرۋلەردىڭ قورىتىندىسى بويىنشا جەر زاڭىن بۇزعانداردىڭ ۇستىنەن 3,7 مىڭ اكىمشىلىك ءىس قوزعالىپ، 500 ميلليون تەڭگە ايىپپۇل سالىنعان.
وتكەن جىلى ەلىمىزدە جەردى ادال پايدالانۋشىلاردى انىقتاۋ ءۇشىن قۇقىقتىق نەگىز قۇرىلاتىنى ايتىلدى.
اۆتور
داۋلەت ىزتىلەۋ
