جۇمىسسىز جاستار ءۇشىن الماتىدا جاڭا پلاتفورما ىسكە قوسىلدى

الماتىدا جاستاردى جۇمىسقا ورنالاستىرۋ ءۇشىن Jobfаir365 ءبىرىڭعاي پلاتفورماسى قۇرىلدى، دەپ حابارلايدى Kazinform.

باعدارلاما ءۇش اسپەكتىنى قامتيدى - جاستاردى ءوز ماماندىعى بويىنشا جۇمىسقا ورنالاستىرۋ قىزمەتى، تەگىن كۋرستار قىزمەتى جانە قالا جاستارىنا ارنالعان اقپاراتتىق پورتال.

بۇدان بولەك، سايتتا ورىس جانە قازاق تىلدەرىندە قىسقا مەرزىمدى كۋرستار بار.

«قىسقا مەرزىمدى كۋرستاردىڭ ءتىزىمىن انىقتاۋ ءۇشىن ەڭبەك نارىعىنداعى سۇرانىسقا تالداۋ جۇرگىزىلدى. تالداۋ جاستاردى تابىستى جۇمىسقا ورنالاستىرۋ ءۇشىن قاجەتتى وزەكتى ءارى سۇرانىسقا يە ماماندىقتاردى انىقتاۋعا مۇمكىندىك بەردى. وسىلايشا، كۋرستار اقپاراتتىق تەحنولوگيا، سيفرلىق ماركەتينگ، قارجى، بۋحالتەرلىك ەسەپ، جوبانى باسقارۋ، كاسىپكەرلىك، ديزاين، ساتۋ مەنەدجەرى، SMM مەنەدجەرى، موبيلوگراف، گرافيكالىق ديزاينەر، تارگەتولوگ، تۋروپەراتور، گيد، كۋرەر، حاۋسكيپەر جانە تاعى باسقا سالالاردى قامتيدى»، - دەپ اتاپ ءوتتى اكىمدىكتەن.

كۋرستىڭ باعىتىنا بايلانىستى ساباق 20-دان 30 ادامعا دەيىنگى توپتا وتكىزىلەدى. پايدالانۋشىلار اپتاسىنا ءۇش رەت 2-3 ساعات وقيدى، وندا وقىتۋدىڭ تەوريالىق بولىگى 1 - 1,5 ايعا دەيىن سوزىلادى.

قازىرگى ۋاقىتتا پورتالدا 3,7 مىڭ بوس جۇمىس ورنى بار جانە 20 وڭىردەن 1,5 مىڭ جۇمىس بەرۋشى تىركەلگەن. بۇگىندە 10,2 مىڭ ادام وقىتىلدى، ونىڭ 9,2 مىڭى جۇمىسقا ورنالاستىرىلدى.

اۆتور

الما مۇقانوۆا