جاپونيا استانا اۋرۋحاناسىنا كومپيۋتەرلىك توموگرافيا كابينەتىن سىيعا تارتتى
جاپونيا ۇكىمەتى استاناداعى اكادەميك ن. ج. باتپەنوۆ اتىنداعى ۇلتتىق عىلىمي تراۆماتولوگيا جانە ورتوپەديا ورتالىعىنا قىمبات قۇرىلعىسى بار كومپيۋتەرلىك توموگرافيا كابينەتىن سىيعا تارتتى، دەپ حابارلايدى قازاقپارات ءتىلشىسى.
جاپونيا ۇكىمەتى 2021 -جىلعى 15-ناۋرىزدا ەكى ەل ۇكىمەتتەرىنىڭ كەلىسىمىنە سايكەس، قازاقستان رەسپۋبليكاسىنىڭ ۇكىمەتى ءۇشىن ەكونوميكالىق جانە الەۋمەتتىك دامۋ باعدارلاماسىن ورىندادى. سونىڭ اياسىندا ءۇش جاپوندىق اپپارات قازاقستان اۋرۋحانالارىنا سىيعا بەرىلگەن. ءار اپپاراتتىڭ قۇنى شامامەن 350 ميلليون تەڭگەنى قۇرايدى.
قۇرىلعىلاردىڭ بىرەۋى الماتىداعى ا. ن. سىزعانوۆ اتىنداعى ۇلتتىق عىلىمي حيرۋرگيا ورتالىعىنا، ەكىنشىسى - ەلورداداعى ۇلتتىق عىلىمي تراۆماتولوگيا جانە ورتوپەديا ورتالىعىنا جانە ءۇشىنشىسى - قاراعاندى وبىلسىنداعى اۋرۋحاناعا سىيعا تارتىلعان.
«ءبىز ەكى ەلدىڭ مۇددەلى تۇلعالارىنىڭ كۇش- جىگەرىمەن وسى جوبانىڭ ءساتتى جۇزەگە اسىرىلعانىنا قۋانىشتىمىز. بۇل 2021 -جىلعى 15- ناۋرىزداعى جاپونيا مەن قازاقستان ۇكىمەتى اراسىنداعى گرانتتىق كومەك تۋرالى كەلىسىمگە سايكەس ىسكە اسىرىلدى. ن. باتپەنوۆ اتىنداعى تراۆماتولوگيا جانە ورتوپەديا عىلىمي ورتالىعىنا بەرىلگەن Fujifilm Superia كومپيۋتەرلىك توموگرافى الەمدەگى ەڭ وزىق سيپاتتامالارعا يە. بولاشاقتا بۇل كومپيۋتەرلىك توموگراف كەڭىنەن قولدانىلادى جانە قازاقستاندىقتاردىڭ ءومىرىن ساقتاپ قالۋعا مۇمكىندىك بەرەدى دەپ ۇمىتتەنەمىز»، - دەدى قازاقستانداعى جاپونيا ەلشىسى دجۋن يامادا.
قىمبات جاپوندىق اپپارات پەن كومپيۋتەرلەر قويىلعان كابينەت جاپونيا جانە قازاقستان تابيعاتىمەن بەزەندىرىلگەن. جاپوندىق Fujifilm Supria ماركالى كومپيۋتەرلىك توموگراف ك ت زەرتتەۋلەرىنىڭ كەڭ اۋقىمىن قامتيدى. بۇل مودەلدىڭ سۋرەت ساپاسى ساپالى جانە پايدالانۋ وڭاي، ەڭ جىلدام جانە ناقتى دياگنوستيكانى قولجەتىمدى باعامەن الۋعا كومەكتەسەدى. اۆتوماتتاندىرىلعان جانە ينتەللەكتۋالدى پروتسەستەر جىلدام جانە ساپالى ناتيجە بەرەدى.
وسى اسپاپتىڭ كومەگىمەن ونكولوگيانى انىقتاپ قانا قويماي، ونىڭ جەكە وشاقتارىن (مەتاستازدار)، سونداي- اق باسقا دا پاتولوگيالىق پروتسەستەردى تابۋعا بولادى. قۇرىلعى كەز كەلگەن مولشەردەگى - بىرنەشە ميلليمەترگە دەيىن ىسىكتەردى كورسەتەدى. وسى ەگجەي- تەگجەيلى دياگنوزدىڭ ارقاسىندا دارىگەر دياگنوزدى ناقتىلاۋعا جانە دۇرىس ەمدەۋدى تاعايىنداۋعا ەرەكشە مۇمكىندىك الادى.
سونداي- اق، سىيعا تارتىلعان ك ت اپپاراتىنىڭ باستى ەرەكشەلىگى - ادەتتەگى 100 كەلى ورنىنا سالماعى 150 كەلىدەن اساتىن ناۋقاستاردى ءجىتى تەكسەرە الادى، بۇل قازاقستاندىقتاردىڭ مەديتسينالىق كومەك الۋعا قولجەتىمدىلىگىن كەڭەيتە تۇسەدى.
ءوز كەزەگىندە ق ر دەنساۋلىق ساقتاۋ ءمينيسترى اجار عينيات جاپونيا ۇكىمەتىنە گرانت رەتىندە كورسەتكەن قولداۋى ءۇشىن العىسىن ءبىلدىرىپ، ەكى ەل اراسىنداعى ودان ءارى جەمىستى ىنتىماقتاستىققا ءۇمىت ءبىلدىردى.
«بۇل جاپونيا حالقىنىڭ ۇلكەن سىيى، ءبىز ءۇشىن وتە ماعىناسى زور. ويتكەنى پاندەميا جىلدارى بارلىق ەلدىڭ باسىنا سىن ءتۇستى، سول ۋاقىتتا ءبىزدىڭ ەلگە ۇلكەن دوستىق كوڭىلمەنەن بەرىلگەن كومەك. سوندىقتان بۇل كومەكتىڭ قانداي ماڭىزدى ەكەنىن تۇسىنەمىز. بۇل جاپونيا تاراپىنان ءبىرجاقتى كومەك بولدى جانە ىنتىماقتاستىق جۇمىستارى ءارى قاراي جالعاسادى. قازىردىڭ وزىندە دەنساۋلىق ساقتاۋ سالاسى بويىنشا عالىمدارىمىز بەن مەديتسينالىق قىزمەتكەرلەرىمىز جاپونيادا ءبىلىم الىپ جاتىر»، - دەدى مينيستر.
ۇلتتىق عىلىمي تراۆماتولوگيا جانە ورتوپەديا ورتالىعىنىڭ پاتسيەنتتەرى بۇل مەديتسينالىق قىزمەتتى م ءا م س شەڭبەرىندە تەگىن الا الادى.
اۆتور
ايدار وسپاناليەۆ
