جاڭا ۇكىمەت ەكونوميكا ءوسىمىن 6 پايىزعا جەتكىزۋ ءۇشىن نە ىستەمەك
استانا. KAZINFORM - پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ قازاقستان ەكونوميكاسىن 6 پايىز وسىمگە شىعارۋ ءۇشىن قانداي شارالار قابىلداناتىنىن ايتتى.
«جىلدىڭ العاشقى ايى تومەن كورسەتكىشپەن باستالىپ وتىر. مۇنى مويىنداۋ كەرەك. ال الدىمىزدا ەكونوميكانىڭ كەم دەگەندە 6 پايىز ءوسىمىن قامتاماسىز ەتۋ مىندەتى تۇر. ول ءۇشىن قانداي قوسىمشا شارالار قابىلدانادى؟» دەپ سۇرادى پرەمەر-مينيستر ۇكىمەت وتىرىسىندا.
مينيستر ءۇش سالاعا باسا ءمان بەرىلەتىنىن ايتتى.
«ەڭ ءبىرىنشى مەملەكەتتىك شىعىستاردى تولىق يگەرۋىمىز كەرەك. ونىڭ ىشىندە باسا نازار اۋداراتىن سالا - بيۋدجەتتىك ينۆەستيتسيانى يگەرۋ جانە مەملەكەتتىك ساتىپ الۋدى تولىق قامتاماسىز ەتۋ. بۇل جەردە وتاندىق تاۋار وندىرۋشىلەرگە باسا نازار اۋدارۋىمىز قاجەت. ەكىنشىدەن، باستى درايۆەرلەر - قۇرىلىس، وڭدەۋ ونەركاسىبى مەن كولىك سالالارىنداعى ينۆەستيتسيالىق جوبالاردى قارقىن جۇزەگە اسىرۋىمىز كەرەك. تاعى ءبىر رەزەرۆ - ورتا جانە شاعىن بيزنەستى ودان ءارى دامىتۋ. بۇل جەردە مەملەكەتتىك قولداۋ ارقىلى ەكىنشى دەڭگەيلى بانكتەردىڭ 1 تريلليون تەڭگەدەن اسا اقشاسىن جۇمىلدىرۋ كوزدەلىپ وتىر»، - دەدى ول.
نۇرلان بايبازاروۆ نەگىزگى كاپيتالعا سالىناتىن ينۆەستيتسيا كولەمىن 22 تريلليون تەڭگەدەن تۇسىرمەۋگە تالپىناتىنىن ايتتى.
«سونىمەن قاتار، «بايتەرەك» جانە «سامۇرىق» حولدينگتەرىندە ىسكە اسىپ جاتقان ءىرى جوبالار بار. سولاردى يگەرۋىمىز كەرەك. ولاردا بوس رەزەرۆ اقشا بار. سونى ءبىز قاراستىرىپ جاتقان جاڭا جوبالارعا باعىتتاۋ كەرەك. بۇل جەردە ۇلكەن جۇمىس بار. نەگىزگى كاپيتالعا سالىناتىن ينۆەستيتسيا 22 تريلليون تەڭگەدەن كەم بولماۋى كەرەك. بۇل جەردە بىزگە كومەكتەسەتىن تاعى ءبىر فاكتور - شەتەلدەن كەلەتىن تىكەلەي ينۆەستيتسيا. مۇنىڭ دەڭگەيىن 25 ميلليارد دوللاردان تۇسىرمەۋىمىز كەرەك. وسى ايتىلعان سالالاردىڭ بارىندە ويداعىداي جۇمىس ىستەسەك، 6 پايىز ءوسىمدى قامتاماسىز ەتە الامىز»، - دەدى ۆەدومستۆو باسشىسى.
اۆتور
ەسىمجان ناقتىباي
