جاڭا بيۋدجەت كودەكسى ۇكىمەتتىڭ دەربەس جاۋاپكەرشىلىگىن ارتتىرادى - ءماجىلىس ءتوراعاسى

استانا. KAZINFORM - بيۋدجەتتىڭ يگەرىلۋ بارىسى دەپۋتاتتاردىڭ باسا نازارىندا بولادى. بۇل تۋرالى ءماجىلىس ءتوراعاسى ەرلان قوشانوۆ ءمالىم ەتتى.

- مەملەكەتتىك ورگاندار ناقتى ناتيجەگە قول جەتكىزۋدە بيۋدجەتتىك دەربەس بولادى. قاراجاتتى يگەرۋ عانا ەمەس، ءدال وسى جايت ولاردىڭ تيىمدىلىگىنە باعا بەرۋگە نەگىز بولماق. ەڭ باستىسى، ۇلتتىق قور قاراجاتى تەك ستراتەگيالىق ماقساتتار مەن ينۆەستيتسياعا جۇمسالادى. مۇنى دەپۋتاتتار قاتاڭ قاداعالايدى. جىل سايىن ۇكىمەت نىسانالى ينديكاتورلاردى بيۋدجەت مۇمكىندىكتەرىنە وراي تۇزەتىپ وتىراتىن. ءبىز وعان جول بەرۋگە بولمايتىنىن بىرنەشە رەت اشىق ايتتىق، - دەدى ەرلان قوشانوۆ ءماجىلىستىڭ جالپى وتىرىسىندا.

ءماجىلىس سپيكەرىنىڭ مالىمدەۋىنشە، مەملەكەتتىك جوسپارلاۋ جۇيەسىنە قويىلاتىن تالاپ بيۋدجەتتى جوسپارلاۋ ساپاسىن جاقسارتادى ءارى مەملەكەتتىك ورگانداردىڭ ستراتەگيالىق باسقارۋ باعىتىن ايقىنداي تۇسەدى.

— الدىڭعى جىلدارى ءبىز رەسپۋبليكالىق بيۋدجەتكە ديۆيدەندتەر تولەۋدە دە تەڭگەرىمسىزدىك بارىن بايقادىق. وسى ماسەلە دە جاڭارتىلعان بيۋدجەت كودەكسىندە رەتتەلگەن. ال كۆازيمەملەكەتتىك سەكتور كومپانيالارىنىڭ ديۆيدەند ساياساتى قايتا قارالدى. جالپى، جاڭا بيۋدجەت كودەكسى مەملەكەتتىك قارجى جۇيەسىن تولىعىمەن قايتا جاڭعىرتىپ، ۇكىمەتتىڭ دەربەس جاۋاپكەرشىلىگىن ارتتىرۋعا ءتيىس. بيۋدجەتتى اتقارۋعا قاتىستى ايتىلعان بۇگىنگى ۇسىنىستارعا ۇكىمەت باسا ءمان بەرۋى قاجەت ەكەنىنە تاعى دا نازار اۋدارعىم كەلەدى. بۇل ماسەلە ءاردايىم دەپۋتاتتاردىڭ باقىلاۋىندا بولادى. جالپى، بىرلەسكەن جۇمىس ءۇشىن بارشاڭىزعا ريزاشىلىعىمدى بىلدىرەمىن. پالاتالاردىڭ الداعى بىرلەسكەن وتىرىسىندا وسى ماسەلەنى تالقىلاۋدى جالعاستىرامىز، - دەپ تولىقتىردى ءتوراعا.

بۇعان دەيىن ەرلان قوشانوۆ ۇلتتىق قور مەن سىرتتان قارىز الۋ ءوسىپ جاتقانىن ايتقان ەدى.