ج و و-لاردا كاپيتالى 50 ميلليارد تەڭگە بولاتىن 5 ەنداۋمەنت قور قۇرىلادى
استانا. KAZINFORM - ەلىمىزدەگى جوعارى وقۋ ورىندارىندا بۇدان بىلاي ستۋدەنتتەر مەن وقىتۋشىلارعا قولداۋ كورسەتەتىن ەنداۋمەنت قورلار سانى ارتاتىن بولادى. بۇل تۋرالى عىلىم جانە جوعارى ءبىلىم ۆيتسە-ءمينيسترى گۇلزات كوبەنوۆا ءمالىم ەتتى.
- بۇل باستاما قازاقستاننىڭ الەمدەگى تابىستى عىلىمى بار ەلدەردە قابىلدانعان عىلىمنىڭ جاڭا اشىق مودەلىنە كوشۋىنە بايلانىستى. ەنداۋمەنت قورلارى ۋنيۆەرسيتەتتەرگە عىلىمي زەرتتەۋلەر جۇرگىزۋگە جانە عىلىمي-زەرتتەۋ جانە تاجىريبەلىك-كونسترۋكتورلىق جۇمىستارعا (ع ز ت ك ج) جەكە ينۆەستيتسيا تارتۋعا قولداۋ كورسەتۋدىڭ نەگىزگى ەلەمەنتىنىڭ بىرىنە اينالۋى ءتيىس. زاڭدى ازىرلەۋ كەزىندە ەنداۋمەنت-قوردىڭ ۇزدىك تاجىريبەسى بار ەلدەردىڭ تاجىريبەسى ەسكەرىلدى. ەڭ ءساتتىسى رەتىندە امەريكالىق ەنداۋمەنت قورلارىنىڭ ۇلگىسى نەگىزگە الىندى، - دەدى ۆيتسە-مينيستر و ك ق الاڭىندا.
سونداي-اق سپيكەر ەنداۋمەنت قورلارى تۋرالى جەكە زاڭ نە ءۇشىن قاجەت بولعانىن ءتۇسىندىردى جانە الداعى ۋاقىتتا 5 ەنداۋمەنت-قور قۇرىلاتىتىن اتاپ ءوتتى.
- جەكە زاڭنىڭ قاجەتتىلىگى ەنداۋمەنت قورلارىنىڭ ەكىجاقتى تابيعاتىمەن بايلانىستى - ءبىر جاعىنان قايىرىمدىلىق، ەكىنشى جاعىنان ينۆەستيتسيالىق قىزمەتتى بىرىكتىرىپ، ونى ءبىر زاڭ اياسىندا رەتتەۋ قاجەت بولدى. قازاقستاندا 22 ەنداۋمەنت قورى بار. ولاردىڭ بارلىعى دەرلىك قاراپايىم قايىرىمدىلىق قورلارى رەتىندە جۇمىس ىستەيدى، ورتاشا مولشەرى 1 ميلليارد تەڭگەدەن تومەن. عىلىم جانە جوعارى ءبىلىمدى دامىتۋ تۇجىرىمداماسىنا ساي، 2029 -جىلعا دەيىن 5 پيلوتتىق ەنداۋمەنت-قور قۇرۋ جوسپارلانىپ وتىر. ولاردىڭ كاپيتالى 50 ميلليارد تەڭگە شاماسىندا بولادى. وسىعان بايلانىستى 5 پيلوتتىق ەنداۋمەنت-قوردىڭ ءتىزىمى مەن ماقساتتى باعىتىن ايقىنداپ الۋ قاجەت، - دەيدى گۇلزات كوبەنوۆا.
ەنداۋمەنت قورلارى تۋرالى جەكە زاڭدى ازىرلەۋ باستاماسىن مەملەكەت باسشىسى قاسىم-جومارت توقايەۆ 2022 -جىلعى قازاقستان حالقىنا جولداۋىندا كوتەرگەن. كەيىن 2023 -جىلعى ساۋىردە عىلىم جانە تەحنولوگيالار جونىندەگى ۇلتتىق كەڭەستىڭ ءبىرىنشى وتىرىسىندا ۋنيۆەرسيتەتتىڭ تۇراقتى ەكوجۇيەسىنىڭ بولىگى رەتىندە ەنداۋمەنت قورلارى قاجەت ەكەنىن اتاپ ءوتتى.
ال 2025 -جىلعى 30 -ماۋسىمدا مەملەكەت باسشىسى «نىسانالى كاپيتال قورلارى جانە ەنداۋمەنت قورلار (نىسانالى كاپيتال) تۋرالى» زاڭعا قول قويدى.
ايتا كەتەيىك، بۇعان دەيىن عىلىم جانە جوعارى ءبىلىم ءمينيسترى ساياسات نۇربەك ەنداۋمەنت قوردى سەپاراتيستىك ماقساتقا پايدالانۋدىڭ تاۋەكەلدەرى تۋرالى پىكىر بىلدىرگەن ەدى.
اۆتور
ەربول جانات
