شىعىس قازاقستاندا سالىنىپ جاتقان اۋەجايلار ساعاتىنا 150 جولاۋشىنى قابىلداي الادى
استانا. قازاقپارات- شىعىس قازاقستان وبلىسىنداعى تاۋلى كاتونقاراعاي اۋدانىندا اۋەجاي اشىلسا، ونداعى شيپاجايلارعا جىلىنا 250 مىڭنان استام تۋريست كەلەدى، دەپ حابارلايدى 24KZ.
جەرگىلىكتى ساراپشىلار وسىنداي بولجام ايتىپ وتىر. مەملەكەت باسشىسىنىڭ تاپسىرماسىنا سايكەس ەلىمىزدىڭ شىعىسىنداعى كورىكتى ايماقتا زاماناۋي اۋەجايلاردىڭ قۇرىلىسى باستالدى. حالىقارالىق دەڭگەيدە سالىنىپ جاتقان جاڭا نىسان ءىرى ۇشاقتاردى دا قابىلداي الادى. بۇل كەلەشەكتە ءىرى كولىك-لوگيستيكالىق حابقا اينالاتىن زايسانداعى بولاشاق اۋەجايدىڭ ورنى. مۇندا قازىر ۇشۋ-قونۋ جولاعى دايىندالىپ جاتىر. اۋدانى 4 مىڭ شارشى مەتر بولاتىن جاڭا اۋەجاي ساعاتىنا 150 جولاۋشىنى قابىلداي الادى. سونداي-اق حالىقارالىق باعىتتارعا دا رەيستەر اشىلادى.
مارات قارابايەۆ، ق ر كولىك ءمينيسترى:
- اۋەجايلار حالىقارالىق تالاپتارعا ساي سالىنادى. ولاردىڭ شەتەلدىك ءىرى اۆيالاينەرلەردى دە قابىلداۋعا مۇمكىندىگى بولادى. زايسانداعى اۋەجايدىڭ قۇرىلىسىنا 16 ميلليارد، كاتونقاراعايعا 22 ميلليارد تەڭگە ينۆەستيتسيا تارتىلادى.
«بۇل ءتيىمدى جوبا»، - دەيدى ماماندار. كاتونقاراعاي ۇلتتىق تابيعي پاركى مەن راحمان قاينارىنا جىل سايىن 100 مىڭنان استام تۋريست كەلەدى. قازاقستاننىڭ شۆەيتسارياسى اتانىپ كەتكەن ايماققا ساياحاتشىلار بىرنەشە كۇن بويى جول تالعامايتىن كولىكپەن ارەڭ جەتۋشى ەدى. ەندى نەبارى 1 جىلدان كەيىن تۋريستەر الماتى مەن استانا قالاسىنان 1,5 ساعاتتا كەلە الادى. سالا ماماندارىنىڭ ايتۋىنشا، اۋەجايلار اشىلعاننان كەيىن كەلۋشىلەر سانى كەم دەگەندە 3 ەسە ارتادى.
كەلۋشىلەر تۇمسا تابيعاتتى، ەرەكشە كورىنىستى كورىپ ەركىندىكتى سەزىنەدى. ەكىنشى شۆەيتساريا اتانعان ولكە تاڭداندىرماي قويمايدى. بۇل جەردى كورگەندەر شىنىندا شۆەيتسارياعا ۇقساتادى. تاۋلى ءۇلبى مەن بۇقتىرمانى تاماشالاعاندار تاڭداي قاعادى. مۇنداي تابيعاتتىڭ بارىن ءبارى بىلە بەرمەيدى.
زايسان مەن كاتونقاراعايداعى اۋەجايلاردى 1 جىل ىشىندە سالۋ جوسپارلانىپ وتىر. بۇل شىنىندا رەكوردتىق كورسەتكىش. قۇرىلىس اياقتالعاننان كەيىن اۋەجايدا قىزمەت كورسەتۋگە جۇزدەگەن مامان قاجەت بولادى. ال ولاردى جەرگىلىكتى ءبىلىم وردالارىندا وقىتۋ جوسپارلانىپ وتىر.
نۇرىمبەت ساقتاعانوۆ، شىعىس قازاقستان وبلىسىنىڭ اكىمى:
- بيىل اۆياتەحنيكتەردى، اۆيامەحانيكتەر مەن ديسپەتچەرلەردى دايارلاۋدى باستايمىز. مۇندا جەرگىلىكتى ستۋدەنتتەردى عانا ەمەس، وزگە وڭىرلەردەن دە كەلىپ ءبىلىم الا الادى. وسىلايشا ەلىمىزدىڭ شىعىسى حالىقارالىق تۋريستىك ورتالىققا اينالماق. ولكەنىڭ كوركەم تابيعاتىن كورگىسى كەلەتىن تۋريستەر ەندى زايسانعا نەمەسە كاتونقاراعايعا ۇشاق بيلەتىن السا بولعانى. مۇندا كەلۋشىلەر ءۇشىن بارلىق جاعداي جاسالادى.
