شىعىس قازاقستاندا قۇرىلىسى «جىر» بولعان وسينوۆ اسۋىنداعى جول قايتا سالىنا باستادى
وسكەمەن. KAZINFORM - شىعىس قازاقستان وبلىسى التاي اۋدانىنداعى قۇرىلىسى «جىر» بولعان وسينوۆ اسۋىنداعى جول قايتا سالىنا باستادى.
2018 -جىلى وسكەمەن- التاي باعىتىنداعى وسينوۆ اسۋىنان توتە جولدىڭ قۇرىلىسى باستالعان بولاتىن.
بۇل - وتە ماڭىزدى جول. سەبەبى التاي اۋدانىنداعى بۇقتىرما سۋ قويماسىنا جانە كاتونقاراعاي اۋدانىنا تۋريستەر تەك وسى جول ارقىلى جەتەدى.
جولدىڭ سالىنىپ بىتپەۋ سەبەبىن اكىمدىك - جول سالۋشىلار بايقاۋسىزدا ورمان شارۋاشىلىعىنىڭ جەرىنە كىرىپ كەتكەن دەپ تۇسىندىرگەن.
«قازاۆتوجول» ۇ ك» ا ق مالىمەتىنە سۇيەنسەك، قازىرگى ۋاقىتتا بۇل ماسەلە شەشىلىپ، قۇرىلىس جۇمىستارى قايتا باستالدى.
«بۇعان دەيىن مەملەكەتتىك ورمان قورى جەرلەرىن كولىكتىك جەر ساناتىنا اۋىستىرۋ راسىمدەرىنىڭ ۇزاققا سوزىلۋىنا بايلانىستى وسينوۆ اسۋىندا قۇرىلىس جۇمىستارىن جۇرگىزۋ مۇمكىن بولمادى. بۇگىندە بارلىق قاجەتتى ءراسىم اياقتالىپ، جەرگە قاتىستى مەملەكەتتىك اكتىلەر الىندى»، - دەلىنگەن اقپاراتتا.
بيىل بۇرعىلاۋ-جارۋ جانە قازۋ جۇمىستارىن اياقتاۋ كوزدەلىپ وتىر. سونىمەن قاتار اسۋداعى پيحتوۆكا وزەنى ارقىلى وتەتىن كوپىرگە تىرەكتەر ورناتىلماق.
جالپى جول قۇرىلىسىن 2025 -جىلعا دەيىن اياقتاۋ جوسپارلانعان.
اۆتور
تالعاتجان مۇحامەتبەك ۇلى
