شەتەلدىكتەر نەلىكتەن قازاقستاننىڭ جوعارى وقۋ ورىندارىن تاڭدايدى
استانا. KAZINFORM - قازاقستان جوعارى ءبىلىم بەرۋ سالاسىندا ازياداعى ءىرى حابتاردىڭ بىرىنە اينالىپ كەلەدى. شەتەلدىك ستۋدەنتتەر نە سەبەپتى ءبىزدىڭ ەلدى تاڭدايدى؟ Kazinform ءتىلشىسىنىڭ ساۋالىنا وراي، عىلىم جانە جوعارى ءبىلىم مينيسترلىگى شەتەلدىك ستۋدەنتتەردى ەلىمىزگە تارتىپ تۇراتىن بىرنەشە نەگىزگى فاكتوردى اتاپ كورسەتتى.
قازاقستانداعى ءبىلىم بەرۋ باعدارلامالارى - قازاق، ورىس جانە اعىلشىن تىلدەرىندە. بۇل ءارتۇرلى تىلدە سويلەيتىن جانە ءتۇرلى مادەني ورتادان كەلگەن ستۋدەنتتەرگە ءبىلىم الۋدى ىڭعايلى ەتەدى. ۋنيۆەرسيتەتتەر اعىلشىن تىلىندەگى باعدارلامالاردى بەلسەندى تۇردە ىسكە قوسىپ جاتىر، بۇل اسىرەسە وڭتۇستىك ازيا مەن تاياۋ شىعىستان كەلگەن ستۋدەنتتەر ءۇشىن ماڭىزدى.
ەكونوميكالىق تيىمدىلىك
قازاقستاندا وقۋ جانە تۇرۋ قۇنى ەۋروپا، ا ق ش جانە كەيبىر ازيا ەلدەرىنە قاراعاندا الدەقايدا تومەن. بۇل ساپالى ءبىلىمدى از شىعىنمەن الۋعا مۇمكىندىك بەرەدى.
ستيپەنديالىق باعدارلامالار
2019 -جىلدان باستاپ قازاقستان شەتەلدىك ستۋدەنتتەرگە، سونىڭ ىشىندە ق ر ازاماتتىعى جوق ەتنيكالىق قازاقتارعا ارنالعان مەملەكەتتىك ستيپەنديالىق باعدارلامانى جۇزەگە اسىرىپ كەلەدى. بۇل ەلىمىزدە ءبىلىم بەرۋدى ودان ءارى قولجەتىمدى ءارى تارتىمدى ەتە ءتۇستى.
ديپلومداردىڭ مويىندالۋى
ەلىمىزدەگى ج و و- لاردىڭ ديپلومدارىن حالىقارالىق دەڭگەيدە مويىنداتۋ باعىتىندا بەلسەندى جۇمىس جۇرگىزىلىپ كەلەدى. ليسسابون كونۆەنسياسىن راتيفيكاتسيالاۋ قازاقستان ديپلومدارىنىڭ 55 ەلدە، سونىڭ ىشىندە ەۋروپا ەلدەرى، ا ق ش، كانادا جانە اۋستراليا مەملەكەتتەرىندە تانىلۋىن قامتاماسىز ەتتى. سونداي-اق 2010 -جىلدان باستاپ قازاقستان بولون ۇدەرىسىنىڭ تولىق مۇشەسى سانالادى، بۇل ەۋروپالىق ءبىلىم بەرۋ ستاندارتتارىنا ساي بولۋعا سەپتىگىن تيگىزدى.
ازيا-تىنىق مۇحيتى ايماعىمەن ينتەگراتسيا
قازىر قازاقستان جوعارى ءبىلىم سالاسىنداعى بىلىكتىلىكتى تانۋ جونىندەگى توكيو كونۆەنسياسىنا قوسىلۋ تۋرالى زاڭ قابىلداۋ ساتىسىندا. بۇل قىتاي، جاپونيا، وڭتۇستىك كورەيا، يندونەزيا جانە اۋستراليا سىندى ەلدەردە ديپلومداردى جەڭىلدەتىلگەن تارتىپپەن تانۋعا جول اشادى. مۇنداي ينتەگراتسيا اكادەميالىق بەيىمدەلۋدىڭ جەدەلدەۋىن، ءوزارا ءبىلىم الماسۋ باعدارلامالارىنىڭ كەڭەيۋىن، قوس ديپلوم جوبالارىن جۇزەگە اسىرۋدى جانە قازاقستاندىق ۋنيۆەرسيتەتتەردىڭ QS Asia مەن THE Asia رەيتينگىلەرىندە جوعارىلاۋىن قامتاماسىز ەتەدى.
وسىنىڭ ءبارى قازاقستاندى شىعىس پەن باتىس اراسىنداعى ترانزيتتىك الاڭ عانا ەمەس، اكادەميالىق ءبىلىم سالاسىنداعى ماڭىزدى الاڭعا اينالدىرادى.
بۇگىنگى تاڭدا 39 شەتەلدىك جوعارى وقۋ ورنىمەن سەرىكتەستىك ورناتىلعان.
اۆتور
ەربول جانات
