شەتەل ءونىمىن «قازاقستاندا جاسالعان» دەپ ساتۋدا: اشىمبايەۆ مەملەكەتتىك ساتىپ الۋ جۇيەسىن سىنادى
استانا. KAZINFORM - سەنات ءتوراعاسى ماۋلەن اشىمبايەۆ مەملەكەتتىك ساتىپ الۋ سالاسىنداعى مونيتورينگ جۇيەسىنە قاتىستى پىكىرىن ايتتى.
ونىڭ ايتۋىنشا، ەلىمىزدە سىبايلاس جەمقورلىققا قاتىستى قۇقىق بۇزۋدىڭ 80 پايىزى مەملەكەتتىك ساتىپ الۋلارمەن بايلانىستى. مۇنداي دەرەكتەردى ازايتۋ ءۇشىن وقيعا بولعاننان كەيىن ەمەس، الدىن الا جۇمىس ىستەيتىن باقىلاۋ جۇيەسى قاجەت.
«مونيتورينگ جۇيەسىنىڭ وتاندىق وندىرۋشىلەردى، مەملەكەتتىك ساتىپ الۋداعى قازاقستاندىق ۇلەستى قولداۋعا ىقپال ەتۋى وتە ماڭىزدى. پرەزيدەنتىمىز مەملەكەتتىك ساتىپ الۋلارداعى ەلىشىلىك قۇندىلىعىمىزدىڭ ۇلەسىن 60 پايىزعا دەيىن جەتكىزۋدى مىندەت ەتىپ قويدى. قازىر ءسىز 50 پايىزى قامتاماسىز ەتىلگەن دەپ ايتىپ وتىرسىز. ءبىز كاسىپكەرلەرمەن كەزدەسۋلەردە وسى ماسەلەگە باسا نازار اۋدارىپ كەلەمىز. سول كەزدە ولار كەيبىر جەتكىزۋشىلەر ءونىمدى باسقا ەلدەردەن جەتكىزىپ، وعان «قازاقستاندا جاسالعان» لوگوتيپىن جاپسىرىپ قوياتىنىن ايتادى. وسىلايشا، ولار تەندەرلەرگە قاتىسىپ، دەمپينگ پەن تومەن باعا ەسەبىنەن ۇتىپ الۋ مۇمكىندىگىنە يە بولادى. ەگەر وسى زاڭدى دەپۋتاتتار قولداسا جانە وعان مەملەكەت باسشىسى قول قويسا، مونيتورينگ جۇرگىزەتىن جۇيەنىڭ قۇرىلۋىنا ىقپال ەتەدى دەپ ۇمىتتەنەمىز. سونداي-اق مەملەكەتتىك ورگاندار ءوز ونىمدەرىن وندىرەتىن، جۇمىس ورىندارىمەن قامتاماسىز ەتەتىن، سالىق تولەيتىن ناقتى قازاقستاندىق وندىرۋشىلەردى قولداۋىنا جول اشىلادى دەپ سەنەمىز»، - دەدى سەنات ءتوراعاسى.
ايتا كەتەيىك، سەناتتىڭ جالپى وتىرىسىندا سەناتورلار ءبىرقاتار زاڭدى قارادى. ونىڭ ىشىندە «مەملەكەتتىك ساتىپ الۋ تۋرالى» زاڭ جانە وعان ىلەسپە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ساتىپ الۋ جانە ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى»، «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭدار دا بار.
پالاتا سپيكەرى زاڭنامالىق تۇزەتۋلەردىڭ ماڭىزىنا نازار اۋدارىپ، مەملەكەت باسشىسى جولداۋدا ساتىپ الۋدىڭ جاڭا ساپالى جۇيەسىن ەنگىزۋدى تاپسىرعانىن تىلگە تيەك ەتتى. سونداي-اق ول زاڭنىڭ نەگىزگى نورمالارىنا توقتالىپ ءوتتى.
اۆتور
رۋسلان عابباسوۆ
