ۇشاقتى كەشىكتىرگەن كومپانيالاردىڭ ايىپپۇلى ارتا ما - مينيستر جاۋابى

استانا. KAZINFORM - كولىك ءمينيسترى ۇشاقتى كەشىكتىرگەن اۋە كومپانيالارىن جازالاۋ شارالارى قالاي قاتاڭداتىلاتىنىن ايتتى.

«بۇعان دەيىن ازاماتتىق اۆياتسيا كوميتەتى Scat جانە FlyArystan كومپانيالارىنا 3,6 ميلليون تەڭگە ايىپپۇل سالعاندارىن حابارلاعان ەدى. ەسەپتەپ قاراساڭىز، ولارعا ۇشاعى كەشىككەن جولاۋشىلارعا قوناقۇي جالداعاننان ايىپپۇل تولەي سالۋ ءتيىمدى ەكەنىن كورەسىز. اۋەمەن جولاۋشى تاسىمالداۋشىلاردى زاڭ تالاپتارىن ساقتاۋعا يتەرمەلەيتىندەي ايىپپۇل تاعايىنداۋعا نيەتتىسىز بە؟» - دەپ سۇرادى جۋرناليست.

مينيستر اتالعان ولقىلىقتار ءۇشىن سالىناتىن ايىپپۇل 1,5 ەسە وسكەنىن ايتتى.

«ەسىڭىزدە بولسا، بۇرىن ۇشاق كەستەدەن 8 ساعات كەشىككەندە عانا قوناق ءۇي مەن سۋسىن ۇسىنىلاتىن. ءبىز وسى ۋاقىتتا ەكى ەسە قىسقارتتىق. سونداي-اق، بۇرىن اۋە كومپانياسى ۇشاقتىڭ كەشىگەتىنىن الدىن الا حابارلاسا، قوناق ءۇي مەن سۋسىن ۇسىنۋعا مىندەتتى ەمەس ەدى. بۇل تۇرعىدا دا زاڭ قاتاڭداتىلدى»، - دەگەن مينيستر ايىپپۇل كولەمىن تاعى كوتەرۋ جوسپاردا جوق ەكەنىن اتاپ ءوتتى.

«ءبىز قازىر ونداي ماسەلەنى قاراستىرىپ جاتقان جوقپىز. ءبىراق قيسىنى بار، قاراۋعا دايىنبىز. ءبىراق وندا دا ايىپپۇل سوماسى بويىنشا ەمەس، كومپانيانىڭ يميدجى تۋرالى ايتىپ وتىرمىن. قازىر ۇشاعى كەشىككەن جولاۋشىلارعا سۋسىن، قوناق ءۇي ۇسىنباي قويۋ سياقتى جايتتار ازايىپ كەلەدى. كومپانيالار مىندەتتەرىن، ورىنداپ، يميدجىن بۇزباۋعا تىرىسىپ جاتىر»، - دەدى ول.

اۆتور

ەسىمجان ناقتىباي