دەپۋتات: В3 بلوگىنداعى 113 مىڭ پەداگوگتىڭ ايلىعىن كوتەرۋ كەرەك
استانا. KAZINFORM - ءماجىلىس دەپۋتاتى نارتاي سارسەنعاليەۆ پرەمەر- مينيستر ولجاس بەكتەنوۆتىڭ اتىنا جولداعان ساۋالىندا الەۋمەتتىك پەداگوگتەردىڭ ايلىعىن كوتەرۋدى ۇسىندى.

- قاڭتاردا مەكتەپتەردى ارالاپ ۇجىممەن كەزدەستىم. سول كەزدە الەۋمەتتىك پەداگوگتاردىڭ ازعانتاي ايلىعى مەن ءبىلىم وردالارىنداعى قاراپايىم قىزمەتكەرلەردىڭ تۇككە جەتپەيتىن جالاقىسى تۋرالى ماسەلە ايتىلدى. 2023 -جىلى الەۋمەتتىك پەداگوگتاردى В3 فۋنكتسيونالدىق بلوگىنان В3 فۋنكتسيونالدىق بلوگىنا اۋىستىرۋ كەرەك دەپ ءماجىلىس مىنبەرىنەن ناقتى ۇسىنىستار بەردىك. ءبىراق ۇكىمەت بۇل ماسەلەنى ءالى شەشكەن جوق. ماسەلەن، ءبىر الەۋمەتتىك پەداگوگ 1500-2000 بالامەن جۇمىس ىستەيمىن دەيدى. وسى قىزمەتى ءۇشىن الاتىن ايلىعى قازىر 118 مىڭ تەڭگە. 2 جىل بۇرىن تالاپ ەتكەنىمدەي الەۋمەتتىك پەداگوگتاردى В3 فۋنكتسيونالدىق بلوگىنا اۋىستىرسا ولاردىڭ ايلىعى 150 مىڭ تەڭگە بولار ەدى، - دەدى دەپۋتات.
دەپۋتات ايتىپ وتىرعان 2023 -جىلعى ۇسىنىستى ۇكىمەت قارجى تاپشىلىعىن العا تارتىپ قولداماعان كورىنەدى.
- ۇكىمەت وكىلىنىڭ جاۋابىنان سوڭ رەسمي ەسەپتەتتىم. 2023-2024 وقۋ جىلىندا ەلىمىزدىڭ جالپى مەملەكەتتىك ءبىلىم بەرۋ ۇيىمدارىندا В3 بلوگىنا جاتاتىن 113352 پەداگوگ جۇمىس ىستەپ ءجۇر. وسى مامانداردىڭ بارلىعىن В3 بلوگىنان В3 بلوگىنا اۋىستىرساق، جىلىنا بيۋدجەتتەن شامامەن 55 ميلليارد تەڭگە قوسىمشا جۇمسالادى ەكەن. ۇرپاققا ءبىلىم مەن تاربيە بەرەتىن مامانداردان ايايتىن اقشا ەمەس بۇل. بۇل ءبىرىنشى تالاپ، - دەدى نارتاي سارسەنعاليەۆ.
سونداي-اق ول ءبىلىم بەرۋ ۇيىمدارىنداعى ەدەن جۋۋشى، اۋلا سىپىرۋشى، ۆاحتەر، كىر جۋعىش ماشينانىڭ وپەراتورى، اسپاز، جۇرگىزۋشى، ەلەكتريك سىندى ماماندار مەن تەحنيكالىق پەرسونالدىڭ جالاقىسى وتە از ەكەنىن اتاپ ءوتتى.
- ءبىلىم بەرۋ ۇيىمدارىنداعى تەحنيكالىق پەرسونال قىزمەتكەرلەرىنىڭ جالاقىسى 2024 -جىلى %71- عا، 2025 -جىلى 100-عا وسەدى دەگەن رەسمي مالىمەتتى ءبارىمىز بىلەمىز. ءبىراق سونىڭ وزىندە اتالعان ازاماتتاردىڭ ايلىعى ەلىمىزدەگى ورتاشا جالاقى تۇرماق مەديانالىق جالاقى دەڭگەيىنە جەتپەيدى. بۇل الەۋمەتتىك ادىلەتسىزدىك، سونى جويىپ جۇمىسشىلاردىڭ جالاقىسىن كوتەرۋ كەرەك، - دەدى دەپۋتات.
ەسكە سالساق، مەملەكەت باسشىسى قاسىم-جومارت توقايەۆتىڭ جارلىعىمەن 2025 -جىل جۇمىسشى ماماندىقتارىنىڭ جىلى دەپ جاريالاندى.
اۆتور
ەسىمجان ناقتىباي