دەپۋتات: «قازاقستاندىق» كولىكتىڭ 90 پايىزى شەتەلدىك بولشەكتەن قۇراستىرىلىپ جاتىر
استانا. KAZINFORM - ءماجىلىس دەپۋتاتى مارحابات جايىمبەتوۆ پرەمەر-ءمينيستردىڭ ءبىرىنشى ورىنباسارى رومان سكليارعا ساۋال جولداپ، «سارى ارقا اۆتوپروم» مەن «Hyundai Trans Kazakhstan» كومپانيالارى قۇيتىرقى سحەمالار ارقىلى مەملەكەتتەن قىرۋار سۋبسيديا الىپ وتىر دەگەن كۇدىگىن ءبىلدىردى.
- 2021 -جىلدان باستاپ وتاندىق اۆتوموبيل وندىرۋشىلەرگە كەمىندە 70 ميلليارد تەڭگە ينۆەستيتسيا قۇيىپ، كەم دەگەندە ەكى ۇلگىنى شاعىن توراپتى ادىسپەن شىعارۋ جانە 2027 -جىلعا دەيىن جەرگىلىكتى قۇرام ۇلەسىن %50- عا جەتكىزۋ مىندەتى قويىلدى. ءبىراق بۇل تالاپتار بارلىق وندىرۋشىلەرگە بىردەي قويىلمادى. نارىقتاعى ءىرى مەكەمەلەر - «سارى ارقا اۆتوپروم» مەن «Hyundai Trans Kazakhstan» بۇرىنعى جەڭىلدەتىلگەن شارتتارمەن جۇمىسىن جالعاستىرۋدا. ياعني ادىلەتسىز باسەكەلەستىك تۋدىرىپ، وزگە ينۆەستورلارعا كەدەرگى كەلتىرەدى، - دەدى دەپۋتات.
ايتۋىنشا، مەملەكەتتەن جان-جاقتى قولداۋ الىپ وتىرعا كاسىپورىندار جىلىنا 25 مىڭ كولىك شىعارۋعا مىندەتتەلگەن. الايدا 2023 -جىلى بار بولعانى 13 مىڭ، 2024 -جىلدىڭ 10 ايىندا 17 مىڭ كولىك قۇراستىرىلعان.
- دەمەك، ءونىمنىڭ %90- دان استامى ءالى دە ءىرى توراپتى ادىسپەن ياعني دايىن كولىكتى بولشەكتەپ قۇراستىرۋ ارقىلى شىعارىلىپ جاتىر. سوعان قاراماستان، مۇنداي ءونىم دە تولىق وتاندىق رەتىندە تانىلىپ، مەملەكەتتىك قولداۋ الىپ كەلەدى. ءسويتىپ، ءبىر بۇراعىشپەن قۇراستىرىلعان كولىككە بيۋدجەتتەن ميللياردتار ءبولىنىپ جاتىر، - دەدى ول.
مارحابات جايىمبەتوۆ بۇقارالىق اقپارات قۇرالدارىندا سىرتقى ساۋدا ستاتيستيكاسىنداعى سايكەسسىزدىكتەر تۋرالى مالىمەتتەر پايدا بولعانىن ەسكە سالدى.
- 2024 -جىلى قىتايدان قازاقستانعا اكەلىنگەن شاناقتاردىڭ قۇنى - 424 ميلليون دوللار. ال قىتايدىڭ دەرەگىندە قازاقستانعا نەبارى 6 ميلليون دوللاردىڭ شاناعى ەكسپورتتالعان. شىندىعىنا كەلسەك دايىن كولىكتەر شاناق بوپ كىرىپ، سالىقتان سىتىلىپ جاتىر. VIN- كودى بار شاناق - تولىق كولىك، ءبىراق ءبىز ونى «جارتىلاي ءونىم» دەپ تىركەپ، ەكىنشى VIN جاپسىرىپ، رەسمي ەسەپتەن جاسىرامىز، - دەگەن دەپۋتات مەملەكەتتىك قولداۋ تەتىكتەرىن ءادىل جانە ناتيجەلى ەتۋ ءۇشىن شاعىن توراپتى قۇراستىرۋ ءادىسىن زاڭنامالىق دەڭگەيدە بەكىتۋدى ۇسىندى.
سونداي- اق، ول ونەركاسىپ جانە قۇرىلىس مينيسترلىگىنە ونەركاسىپتىك قۇراستىرۋ شارتتارىنىڭ ساقتالۋىن مەملەكەتتىك باقىلاۋ جونىندەگى وكىلەتتىكتەرىن بەرۋ كەرەكتىگىن ايتتى.
بۇعان دەيىن قازاقستاندا ءۇش جىلدىڭ ىشىندە 800 دەن استام اۆتوكولىك زاڭسىز تىركەلگەنى ءمالىم بولعان ەدى.
اۆتور
ەسىمجان ناقتىباي
