دەپۋتات بيۋدجەت تاپشىلىعى جونىندە: جوسپارلاۋ تاسىلىندەگى كەمشىلىكتەردى جويۋ كەرەك

استانا. KAZINFORM - بيۋدجەت تاپشىلىعىنا جوسپارلاۋ تاسىلىندەگى كەمشىلىكتەر اسەر ەتىپ وتىر. بۇل تۋرالى ءماجىلىس دەپۋتاتى مۇرات ەرگەشبايەۆ ءمالىم ەتتى.

- بيۋجەت تاپشىلىعىن داعدارىس دەپ باعالاۋعا كەلمەيدى، سەبەبى الەم ەلدەرىنىڭ كوبىسىندە بيۋدجەت تاپشىلىعى بار. ءبىراق بيۋدجەت پروفيتسيتى بار مەملەكەتتەر دە كەزدەسەدى.

مەنىڭ ويىمشا، تاپشىلىقتىڭ باستى سەبەبى - جوسپارلاۋ ءتاسىلى دۇرىس ەمەس. بىرىنشىدەن، شىعىنىن دۇرىس جوسپارلامايمىز. ەكىنشىدەن، تابىس تا ءتيىستى دەڭگەيگە جوسپارلانباي وتىر، - دەدى م. ەرگەشبايەۆ.

وسى ورايدا دەپۋتات 2024 -جىلى بيۋدجەت تاپشىلىعى 3,6 تريلليون تەڭگەنى قۇراعىنان ەسكە سالدى.
ءوز كەزەگىندە ەكونوميست، تاۋەلسىز ساراپشى ەرلان كاريموۆ جوسپارلاۋدا ءتيىستى پروبلەما بار دەگەن ۋاجبەن كەلىسەتىنىن ايتتى.

- كەزىندە قابىلدانعان مەملەكەتتىك باعدارلامالار بار. ولارعا قوماقتى قاراجات ءبولىندى. بەس باعدارلامانىڭ وزىنە - «نۇرلى جەر»، «نۇرلى جول»، ۇدەمەلى يندۋستريالدى-يننوۆاتسيالىق دامۋ، بيزنەستىڭ جول كارتاسىنا 20 تريلليون تەڭگە شاماسىندا قاراجات ءبولىندى. وسى باعدارلامالار مەرزىمىنەن بۇرىن جويىلدى. بۇل قاراجات قانشالىقتى ءتيىمدى جۇمسالدى؟! ونىڭ ناتيجەسى قايدا؟، - دەدى ساراپشى.

ەسكە سالساق، جاقىن ارادا پارلامەنت ءماجىلىسى قازاقستان ۇكىمەتىنىڭ جانە ق ر جوعارى اۋديتورلىق پالاتاسىنىڭ 2024 -جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرىن تالقىلايدى.