«دەمالۋعا قايتسە دە كەلەدى» دەگەن قارابايىر تۇسىنىك تۋريستىك يميدجگە نۇقسان كەلتىرەدى - ولجاس بەكتەنوۆ

استانا. KAZINFORM - تۋريزم نارىعىندا باسەكەنىڭ بولماۋى قىزمەت كورسەتۋ باعاسىنىڭ قىمباتتاۋىنا الىپ كەلەدى. بۇل تۋرالى بۇگىن ۇكىمەت وتىرىسىندا پرەمەر- مينيستر ولجاس بەكتەنوۆ ايتتى.

«جالپى، ەلىمىزدىڭ تۋريستىك سالاسىنا تارتىلعان ينۆەستيتسيا كولەمى ايتارلىقتاي ارتا تۇسكەنى بايقالادى. وتكەن جىلدىڭ قورىتىندىسى بويىنشا 53 پايىزعا ءوستى. دەسە دە، كەيبىر وڭىرلەردە ينۆەستيتسيا تارتۋ دەڭگەيى كەرىسىنشە تومەندەپ كەتكەنىن كورىپ وتىرمىز. ولاردىڭ قاتارىندا اتىراۋ، قاراعاندى، جەتىسۋ، پاۆلودار، اقمولا جانە باتىس قازاقستان وبلىستارىن اتاپ وتۋگە بولادى. بۇل وڭىرلەر تاريحي-مادەني مۇرالارعا باي ءارى كورىكتى جەرلەر دە كوپ. دەمەك، اكىمدىكتەردە بۇل باعىتتاعى جۇمىسقا ءتيىستى ىقىلاس جوق دەگەن ءسوز»، - دەدى ۇكىمەت باسشىسى.

وسى ورايدا ولجاس بەكتەنوۆ مەملەكەت باسشىسى ينفراقۇرىلىمدى كەشەندى تۇردە دامىتىپ، سەرۆيس ساپاسىن تۇبەگەيلى جاقسارتۋدى تاپسىرعانىن ەسكە سالدى.

«ويتكەنى ءدال وسى پروبلەمالار تۋريزمنىڭ دامۋىنا تۇساۋ بولىپ وتىر. ەلىمىزدە كوزدىڭ جاۋىن الاتىن كورىكتى جەرلەر كوپ. ءبىراق ولارعا جەتۋدىڭ ءوزى ءبىر مۇڭ. ازىرگە جاعدايدىڭ وزگەرەتىن ءتۇرى بايقالمايدى. مىسالى، شىعىس قازاقستاندى نەمەسە بالقاش پەن الاكولدى الىپ قارايتىن بولساق، نە ساپالى جول جوق، نە ايالدايتىن ارنايى تۇراقتار مەن كەمپينگتەر قارالماعان. تۋريستەر كۇيى كەتكەن دەمالىس ورىندارى مەن ونداعى سانيتاريالىق تالاپتارعا ساي كەلمەيتىن قولايسىز جاعدايلارعا مويىنسۇنۋعا ءماجبۇر»، - دەدى ول.

سونىمەن قاتار پرەمەر-مينيستر نارىقتا باسەكەنىڭ بولماۋى قىزمەت كورسەتۋ باعاسىنىڭ قىمباتتاۋىنا الىپ كەلەتىنىن باسا ايتتى.

«باسەكە جوق جەردە، سەرۆيس ساپاسى دا اقساي بەرەتىنى انىق. تۋريستىك بيزنەستە «دەمالۋعا قايتسە دە كەلەدى؟» دەگەن قارابايىر تۇسىنىك قالىپتاسقان. ءدال وسىنداي كوزقاراس ەلىمىزدىڭ تۋريستىك يميدجىنە نۇقسان كەلتىرەدى»، - دەدى ۇكىمەت باسشىسى.

اۆتور

مارلان جيەمباي