ءىرى بيزنەس ەلىمىزدىڭ تەحنولوگيالىق جانە يننوۆاتسيالىق دامۋىندا ماڭىزدى ءرول اتقارادى - ولجاس بەكتەنوۆ
استانا. KAZINFORM - ولجاس بەكتەنوۆ ءىرى بيزنەس وكىلدەرىمەن ەكونوميكانىڭ ناقتى سەكتورىن دامىتۋ ماسەلەلەرىن تالقىلادى. بۇل تۋرالى ق ر ۇكىمەتىنىڭ باسپا ءسوز قىزمەتى مالىمدەدى.
پرەمەر-مينيستر ولجاس بەكتەنوۆتىڭ توراعالىعىمەن «اتامەكەن» كاسىپكەرلەر پالاتاسى مەن ءىرى بيزنەس وكىلدەرىنىڭ قاتىسۋىمەن وتاندىق كاسىپكەرلەر كەڭەسىنىڭ وتىرىسى ءوتتى.
باستى ماقسات - پرەزيدەنتتىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى قازاقستان حالقىنا جولداۋىندا قويعان مىندەتتەردى ىسكە اسىرۋ شەڭبەرىندە كاسىپكەرلىكتى دامىتۋدىڭ وزەكتى ماسەلەلەرىن تالقىلاۋ جانە ودان ءارى ءوزارا ءىس-قيمىل شارالارىن قاراستىرۋ.
ولجاس بەكتەنوۆ مەملەكەت ينۆەستيتسيالىق تارتىمدىلىقتى ارتتىرۋ، ەلىمىزدىڭ ونەركاسىپتىك الەۋەتىن اشۋ، ينفراقۇرىلىمدىق ماسەلەلەردى شەشۋ جانە ەكونوميكانىڭ ناقتى سەكتورىن دامىتۋ بويىنشا اۋقىمدى جۇمىستار اتقارىپ جاتقانىن اتاپ ءوتتى. ءوز كەزەگىندە، ءىرى بيزنەس ەلىمىزدىڭ تەحنولوگيالىق جانە يننوۆاتسيالىق دامۋىندا ماڭىزدى ءرول اتقارادى، شاعىن جانە ورتا كاسىپكەرلىكتى دامىتۋعا مۇمكىندىك بەرەدى.
تالقىلاۋ بارىسىندا ەنەرگەتيكا، وڭدەۋ، ونەركاسىبى مۇناي-گاز سەكتورى، تاۋ-كەن مەتاللۋرگيا كەشەنى، ا ءو ك، كولىك جانە قارجى سالاسى، دەنساۋلىق ساقتاۋ، ІТ، تۋريزم سالالارىنىڭ وكىلدەرى ءوز ۇسىنىستارىن ءبىلدىردى. مەتالداردى تەرەڭ وڭدەۋ، مۇناي- گاز حيمياسى جانە باسقا دا باسىم سالالارداعى جاڭا جوبالارعا باسا نازار اۋدارا وتىرىپ، وتاندىق تاۋار وندىرۋشىلەردى قولداۋ ماسەلەلەرى كوتەرىلدى.
ەل ىشىلىك قۇندىلىقتى دامىتۋعا ەرەكشە كوڭىل ءبولىندى. ۇكىمەت «اتامەكەن» ۇ ك پ- مەن بىرلەسىپ، تاۋارلارداعى، جۇمىستار مەن كورسەتىلەتىن قىزمەتتەردەگى قازاقستاندىق قامتۋ ۇلەسىن ايقىنداۋ بويىنشا جاڭا ءادىسنامانى ازىرلەۋ بويىنشا جۇمىس جۇرگىزۋدە. ولجاس بەكتەنوۆ جاڭا تەتىك اناعۇرلىم ءادىل بولاتىنىن جانە وتاندىق كاسىپورىنداردىڭ دامۋىنا ەلەۋلى سەرپىن بەرەتىنىن اتاپ ءوتتى. ءتيىستى قۇرىلىمدارعا جۇرگىزىلىپ جاتقان جۇمىستى جەدەلدەتۋ تاپسىرىلدى.
جاساندى ينتەللەكت جۇيەلەرىن قولدانۋدى كەڭەيتۋ جانە سيفرلىق تەحنولوگيالاردى دامىتۋ ماسەلەلەرى قارالدى. ەكولوگيالىق تازا، ەنەرگيا ۇنەمدەيتىن جانە تومەن كومىرتەكتى جوبالاردى ىسكە اسىرۋعا باعىتتالعان تۋريزم، تۇرعىن ءۇي-كوممۋنالدىق شارۋاشىلىق، «جاسىل» قارجىلاندىرۋ سالاسىن دامىتۋدىڭ ماڭىزدى ەكەنى ايتىلدى.
تالقىلاۋ بارىسىندا ەلىمىزدى تۇراقتى ەنەرگيامەن قامتاماسىز ەتۋ ماسەلەسىنە نازار اۋدارىلدى. بيزنەس وكىلدەرى مەملەكەت باسشىسىنىڭ اتوم ەنەرگەتيكاسىن دامىتۋ جونىندەگى باستاماسىن قولداپ، ەنەرگيا تاپشىلىعى جاعدايىندا ونەركاسىپتى ودان ءارى دامىتۋ جانە جاڭا نىسانداردى ىسكە قوسۋ ءۇشىن تۇراقتى ءارى سەنىمدى ەنەرگيانىڭ جاڭا كوزى قاجەت ەكەنىن اتاپ كورسەتتى. وسىلايشا، بيىلعى 6-قازانداعى اتوم ەلەكتر ستانساسىن سالۋ جونىندەگى رەفەرەندۋمدا وڭ شەشىم قابىلدانعان جاعدايدا، ەلىمىزدە اعىمداعى جانە كەلەشەگى بار وندىرىستەردىڭ ەنەرگەتيكاعا دەگەن قاجەتتىلىكتەرىن جابۋعا، جاڭا جۇمىس ورىندارىن اشۋعا جانە ت. ب. مۇمكىندىك بولادى.
اۆتور
باقىتگۇل اباي قىزى
