ءبىز 600 گە جۋىق قازاقستاندىقتىڭ شەتەلدىك ەسەپشوتىنداعى اقشا جايلى مالىمەت الدىق - ەرجان ءبىرجانوۆ

استانا. قازاقپارات - 600-گە جۋىق قازاقستاندىقتىڭ شەتەلدەگى ەسەپشوتىنا قاتىستى مالىمەت الىندى. بۇل جايىندا Jibek Joly تەلەارناسىنىڭ «قايتارىلۋى ءتيىس» دەرەكتى فيلمىندە قارجى ۆيتسە-ءمينيسترى ەرجان ءبىرجانوۆ ايتتى.

ونىڭ اتاپ وتۋىنشە، قازاقستاندىقتاردىڭ شەتەلدەگى قارجىلىق وپەراتسيالارىنا قاتىستى مالىمەت الۋ جۇمىسى جۇرگىزىلىپ جاتىر.

«بۇگىندە قازاقستان ستراسبۋرگ كونۆەنتسياسىنا قوسىلدى. وعان سايكەس، مەملەكەتتەر وزگە ەلدىڭ رەزيدەنتتەرىنىڭ قارجىلىق وپەراتسيالارىمەن الماسادى. ياعني، ءبىز بۇگىندە 600-گە جۋىق قازاقستاندىقتىڭ دەرەكتەرىن الدىق - ولاردىڭ قاي ەلدە جانە قانداي مامىلە جاساعانىن، شەتەلدىك ەسەپشوتىنا قانشا قاراجات تۇسكەنىن ءبىلىپ وتىرمىز. مۇنىڭ ۇستىنە وسى 80 ەلدىڭ وففشورلىق يۋريسديكسياسى بار ەكەندىگىن ايتا كەتكىم كەلەدى جانە جىل سايىن اتالعان كونۆەنتسياعا قوسىلىپ، دەرەك الماساتىن ەلدەردىڭ سانى ارتىپ كەلە جاتىر. ياعني، بارلىق ەل تازارعىسى، شىنايى، تازا تابىستى كورسەتكىسى كەلەدى. بۇكىل مەملەكەتتەر الاياقتىق، كاپيتالدى جىلىستاتۋ فاكتىلەرىن تىيىپ جاتىر. بۇل – جالپى الەمدىك تەندەنسيا»، - دەيدى ۆيتسە- مينيستر.

اۆتور

مارلان جيەمباي