ءبىرقاتار الەۋمەتتىك جاردەماقىنى تاعايىنداۋ قاعيدالارىنا وزگەرىستەر ەنگىزىلدى

استانا. KAZINFORM - بالا تۋعاندا بەرىلەتىن مەملەكەتتىك جاردەماقى، بالا كۇتىمىنە بايلانىستى بەرىلەتىن جاردەماقى، كوپبالالى وتباسىلارعا بەرىلەتىن جاردەماقى، ناگرادتالعان اناعا بەرىلەتىن جاردەماقىنى تاعايىنداۋ جانە تولەۋ قاعيدالارىنا وزگەرىستەر ەنگىزىلدى.

ەڭبەك جانە حالىقتى الەۋمەتتىك قورعاۋ ءمينيسترىنىڭ بۇيرىعى «اشىق ن ق ا» پورتالىندا جاريالاندى.

وزگەرىستەر قانداي مەملەكەتتىك جاردەماقىلارعا قاتىستى:

- بالا تۋۋىنا بايلانىستى ءبىرجولعى مەملەكەتتىك جاردەماقى؛

- بالا ءبىر جارىم جاسقا تولعانعا دەيىن ونىڭ كۇتىمىنە بايلانىستى اي سايىنعى مەملەكەتتىك جاردەماقى؛

- بىرگە تۇراتىن ءتورت جانە ودان كوپ كامەلەتكە تولماعان بالاسى، ونىڭ ىشىندە 18 جاسقا تولعاننان كەيىن ءبىلىم بەرۋ ۇيىمدارىن بىتىرەتىن ۋاقىتقا دەيىن (23 جاسقا تولعانعا دەيىن) جالپى ورتا، تەحنيكالىق جانە كاسىپتىك، ورتا بىلىمنەن كەيىنگى، جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىندا جالپى ءبىلىم بەرەتىن نەمەسە كاسىپتىك باعدارلامالار بويىنشا كۇندىزگى وقۋ نىسانى بويىنشا ءبىلىم الاتىن بالالارى بار كوپبالالى وتباسىلارعا بەرىلەتىن اي سايىنعى مەملەكەتتىك جاردەماقى؛

- «التىن القا»، «كۇمىس القا» القالارىمەن ناگرادتالعان نەمەسە بۇرىن «باتىر انا» اتاعىن العان، 1 جانە Ⅱ دارەجەلى «انا داڭقى» وردەندەرىمەن ناگرادتالعان كوپ بالالى انالارعا بەرىلەتىن اي سايىنعى مەملەكەتتىك جاردەماقى.

- ارناۋلى مەملەكەتتىك جاردەماقى؛

- مۇگەدەكتىگى بار بالانى تاربيەلەپ وتىرعان اناعا نەمەسە اكەگە، بالا اسىراپ الۋشىعا، قورعانشىعا (قامقورشىعا) تاعايىندالاتىن جانە تولەنەتىن مەملەكەتتىك جاردەماقى، ءبىرىنشى توپتاعى مۇگەدەكتىگى بار ادامعا كۇتىم جاسايتىن ادامدارعا بەرىلەتىن مەملەكەتتىك جاردەماقى.

جاردەماقىلار تاعايىندالادى:

- «ازاماتتارعا ارنالعان ۇكىمەت» مەملەكەتتىك كورپوراتسياسى ارقىلى؛

- egov.kz ەلەكتروندىق ۇكىمەت ۆەب-پورتالى ارقىلى؛

- ۇيالى بايلانىس ابونەنتتىك قۇرىلعىسى ارقىلى (قىزمەت الۋشىنىڭ ۇيالى بايلانىس ابونەنتتىك قۇرىلعىسىنىڭ تەلەفون ءنومىرى ەلەكتروندىق ۇكىمەت ۆەب- پورتالىندا تىركەلگەن جاعدايدا)؛

- ەكىنشى دەڭگەيلى بانكتەردىڭ اقپاراتتاندىرۋ وبەكتىلەرى ارقىلى.

مەملەكەتتىك قىزمەت كورسەتۋ مەرزىمى:

- مەملەكەتتىك كورپوراتسياعا جۇگىنگەن ساتتەن، قۇجاتتاردى تىركەگەن ساتتەن باستاپ - 7 جۇمىس كۇنى؛

- پورتالعا، ەكىنشى دەڭگەيلى بانكتەردىڭ اقپاراتتاندىرۋ وبەكتىلەرىنە نەمەسە پرواكتيۆتى قىزمەتكە جۇگىنگەن ساتتەن كەيىن - 4 جۇمىس كۇنى.

- مەملەكەتتىك كورپوراتسياعا قۇجاتتاردى تاپسىرۋ ءۇشىن كۇتۋ ۋاقىتىنىڭ ەڭ ۇزاق رۇقسات ەتىلگەن مەرزىمى - 15 مينۋت؛

- مەملەكەتتىك كورپوراتسيادا قىزمەت كورسەتۋ ۋاقىتىنىڭ ەڭ ۇزاق رۇقسات ەتىلگەن مەرزىمى - 20 مينۋت.

قۇجات 2025 -جىلعى 16 -ماۋسىمدا كۇشىنە ەنەدى، بۇيرىقپەن تولىعىراق سىلتەمەگە ءوتىپ تانىسۋعا بولادى.

ايتا كەتەيىك، بيىل بالا تۋۋ مەن بالا كۇتىمىنە بايلانىستى شامامەن 300 ميلليارد تەڭگە جاردەماقى تولەندى.

اۆتور

داۋلەت ىزتىلەۋ