ءبىر پرەپاراتتىڭ ءارتۇرلى ءدارىحاناداعى باعاسى 3-5 ەسەگە دەيىن وزگەرەدى - اۋديت

استانا. KAZINFORM - بۇگىن پارلامەنت ءماجىلىسىنىڭ جالپى وتىرىسىندا دەپۋتات اسحات ايماعامبەتوۆ ەلىمىزدە ءدارى-دارمەكتىڭ شەكتى باعاسىنا قاتىستى پروبلەمانى ايتتى.

- شەكتى باعالاردى قالىپتاستىرۋ كەزىندەگى ورەسكەل زاڭ بۇزۋ انىقتالدى. ولاردىڭ قاتارىندا شامادان تىس ماركەتينگتىك جانە تاسىمالداۋ شىعىندارىن قوسۋ بايقالدى. پرەپاراتتار ءتىپتى وريگينالدارىنان دا بىرنەشە ەسە جوعارى باعامەن ساتىپ الىنعان.

دارىلەرگە قوسىلعان ۇستەمە باعا زاۋىتتىق باعادان 172 پايىزعا دەيىن جەتەدى، ال ەۋروپادا جانە الەمدە 30 پايىزدان اسپايدى.

ءبىر پرەپاراتتىڭ ءارتۇرلى ءدارىحاناداعى باعاسى 3-5 ەسەگە دەيىن وزگەرەدى. ءتۇپنۇسقانىڭ باعاسى 344 تەڭگە بولسا، وتاندىق تاۋار ءوندىرۋشىنىڭ (و ت ءو) گەنەريگىنىڭ باعاسى 1273 تەڭگەنى قۇراعان. بۇل 4 ەسەگە دەيىن قىمبات. بۇل قالاي مۇمكىن بولدى؟ وتاندىق زاۋىت ەلدە ساتىلمايتىن شەتەلدىك انالوگتىڭ باعاسىن الىپ، سوعان بايلانىستىرىپ، ءوز شىعىندارى مەن باعاسىن ەسەپتەپ، سولاي ءدارىنىڭ باعاسى كوتەرىلەدى. ونى وريگينالمەن سالىستىرساق، كوپتەگەن وتاندىق دارىلەر شەتەلدىك ءتۇپنۇسقاسىنان ەسەلەپ قىمبات بولىپ شىعادى، - دەدى ا. ايماعامبەتوۆ.

ونىڭ ايتۋىنشا، «پاراسەتامولدىڭ» زاۋىتتىق باعاسى 59 تەڭگە. بۇل پرەپارات قىرعىزستاندا 90 تەڭگە بولسا، ال قازاقستاندا 144 تەڭگەگە ساتىلىپ جاتىر.

- سالىستىرىڭىزدار، «تەرافليۋگە» ەلدە بەلگىلەگەن شەكتى باعا 3,3 مىڭ تەڭگە، ال زاۋىتتىق باعاسى 1,5 مىڭ تەڭگە، رەسەيدە - 2,2 مىڭ تەڭگە، قىرعىزستاندا 2,5 مىڭ تەڭگە تۇرادى... ءتىپتى، سۇمدىق جاعداي، ءدارىحانالاردا بيۋدجەت ەسەبىنەن ساتىپ الىنعان دارىلەر انىقتالدى، - دەدى دەپۋتات.

بۇدان بۇرىن حابارلانعانداي، ق ر جوعارى اۋديتورلىق پالاتاسىنىڭ ءتوراعاسى ءاليحان سمايىلوۆ قازاقستاندا ازاماتتاردى ءدارى-دارمەكپەن قامتاماسىز ەتۋ جۇيەسىنە جۇرگىزىلگەن مەملەكەتتىك اۋديت ناتيجەسىن جاريالادى.

سونىمەن قاتار ءماجىلىسىنىڭ جالپى وتىرىسىندا دەپۋتات اسحات ايماعامبەتوۆ قازاقستاندا ءدارىنى تىركەۋ ءۇشىن وتە كۇردەلى بيۋروكراتيالىق راسىمدەردەن ءوتۋ كەرەك ەكەنىن ايتىپ، وسى سالانى سىنعا الدى.

اۆتور

رۋسلان عابباسوۆ