ءبىلىم گرانتتارىن تاعايىنداۋ كونكۋرسىنا 104 مىڭنان استام تالاپكەر قاتىسۋعا ءوتىنىش بەردى
استانا. قازاقپارات - ءبىلىم گرانتتارىن تاعايىنداۋ كونكۋرسىنا 104 مىڭنان استام تالاپكەر قاتىسۋعا ءوتىنىش بەردى. وتكەن جىلمەن سالىستىراتىن بولساق، 2023 -جىلى 94 مىڭنان استام ءوتىنىش قابىلدانعان بولاتىن.
ەستەرىڭىزگە سالساق، بيىل باكالاۆرياتقا ءتۇسۋ ءۇشىن 79 مىڭعا جۋىق گرانت ءبولىنىپ وتىر. گرانتتاردىڭ باسىم بولىگى ينجەنەرلىك جانە تەحنيكالىق باعىتتارعا بولىنگەن. بيىل العاش رەت ءىشىنارا وقۋ اقىسى بار سارالانعان گرانتتار ەنگىزىلدى. «پەداگوگيكالىق عىلىمدار» جانە «الەۋمەتتىك عىلىمدار، جۋرناليستيكا جانە اقپارات» باعىتتارى بويىنشا 150 سارالانعان گرانتتان بولىنگەن. سونداي-اق، «سەرپىن» باعدارلاماسى ارقىلى تۇسۋشىلەرگە 3903 گرانت بولىنگەن. گرانتتار تىزىمىندە 5000 حالىق تىعىز قونىستانعان جانە باتىس وڭىرلەردىڭ جاستارىن جەتەكشى جوعارى وقۋ ورىندارىندا وقىتۋ ءۇشىن ماقساتتى ءبىلىم بەرۋ گرانتى بار.
«ەڭ كوپ تاڭدالعان قالا - الماتى، 42 مىڭ بالا وڭتۇستىك استانامىزدى ستۋدەنتتىك شاق وتكىزۋ ءۇشىن تاڭداعان. ەلوردانىڭ وقۋ ورىندارىندا وقۋ ءۇشىن 22 مىڭ ءوتىنىش قابىلدانسا، 6,5 مىڭ ادام شىمكەنت ق. ۋنيۆەرسيتەتتەرىندە وقۋعا نيەت بىلدىرگەن.
بىرنەشە جىل قاتارىنان تالاپكەرلەر ەڭ كوپ سۇرانىسقا يە وقىتۋ باعىتتارى بويىنشا تاڭداۋدى وزگەرىسسىز جاساپ جاتىر. وتىنىشتەردىڭ كوپشىلىگى «پەداگوگيكالىق عىلىمدار»، «ينجەنەرلىك، وڭدەۋ جانە قۇرىلىس سالالارى» جانە «اقپاراتتىق- كوممۋنيكاتسيالىق تەحنولوگيالار» سياقتى باعىتتارعا بەرىلدى. قابىلداۋ ناۋقانىنىڭ ناتيجەسىنە سايكەس بولاشاق ءتىس دارىگەرلەرى، ديپلوماتتار، مۇعالىمدەر جانە پسيحولوگتار اراسىندا ءبىر گرانتتىق ورىنعا ەڭ ۇلكەن كونكۋرس كۇتىلۋدە»، - دەپ جازدى عىلىم جانە جوعارى ءبىلىم مينيسترلىگىنەن.
گرانتتار تاعايىنداۋ جونىندەگى شەشىمدى رەسپۋبليكالىق كونكۋرستىق كوميسسيا قابىلدايدى. ونىڭ قۇرامىنا ق ر پارلامەنتىنىڭ دەپۋتاتتارى، مەملەكەتتىك ورگانداردىڭ جانە قوعامدىق ۇيىمداردىڭ وكىلدەرى كىرەدى.
گرانت يەگەرلەرىنىڭ ءتىزىمى ق ر عىلىم جانە جوعارى ءبىلىم مينيسترلىگىنىڭ سايتىندا جانە @gylym_jogary_bilim تەلەگرام- ارناسىندا، www.testcenter.kz سايتى (ۇ ت و- نىڭ رەسمي سايتى) جانە TESTCENTERKZ تەلەگرام-ارناسىندا 10-تامىزعا دەيىن جاريالانادى.
ال جوعارى وقۋ ورىندارىنا قابىلداۋ، ادەتتەگىدەي، 25-تامىزدا اياقتالادى.
اۆتور
اسحات رايقۇل
