عاني بەيسەمبايەۆ ۇرىمجىدە «قىتاي - ورتالىق ازيا» ءبىلىم مينيسترلەرىنىڭ العاشقى كەڭەسىنە قاتىستى
استانا. KAZINFORM - ءۇرىمجى قالاسىندا قىتاي حالىق رەسپۋبليكاسى مەن ورتالىق ازيا ەلدەرى - قازاقستان، وزبەكستان، قىرعىزستان، تاجىكستان جانە تۇرىكمەنستاننىڭ ءبىلىم مينيسترلەرى، سونداي-اق ءتيىستى ۆەدومستۆولار مەن ديپلوماتيالىق كورپۋس وكىلدەرىنىڭ قاتىسۋىمەن العاشقى كەڭەس ءوتتى.
ق ر وقۋ-اعارتۋ مينيسترلىگى مالىمەتىنشە، جيىننىڭ باستى تاقىرىبى ءبىلىم بەرۋ سالاسىنداعى ينتەگراتسيا مەن ورنىقتى ارىپتەستىكتى قۇرۋ ماسەلەلەرى بولدى.
قازاقستان وقۋ-اعارتۋ ءمينيسترى عاني بەيسەمبايەۆ ءوز سوزىندە قاتىسۋشى ەلدەر اراسىنداعى ىنتىماقتاستىقتى نىعايتۋ مەن ءبىلىم بەرۋ بويىنشا ورتاق باستامالاردى جۇزەگە اسىرۋدىڭ ماڭىزدىلىعىن اتاپ ءوتىپ، تەحنيكالىق جانە كاسىپتىك ءبىلىم بەرۋ سالاسىنداعى ودان ارعى ءوزارا ءىس-قيمىلدىڭ نەگىزگى باعىتتارىنا توقتالدى.
- قازاقستاندا مەملەكەت باسشىسى قاسىم-جومارت توقايەۆتىڭ باستاماسىمەن 2025 -جىل جۇمىسشى ماماندىقتار جىلى دەپ جاريالاندى. قازىر تەحنيكالىق جانە كاسىپتىك ءبىلىم بەرۋ جۇيەسىندە اۋقىمدى وزگەرىستەر جۇزەگە اسىپ جاتىر. ينتەرناتسيونالداندىرۋ اياسىندا الەمنىڭ جەتەكشى كوللەدجدەرى مەن وندىرىستىك كاسىپورىندارىمەن سەرىكتەستىك ورناتىلىپ، بيزنەس قاۋىمداستىقپەن ىنتىماقتاستىق كەڭەيىپ جاتىر، پەداگوگتەر مەن ستۋدەنتتەر ءۇشىن اكادەميالىق ۇتقىرلىق جەتىلدىرىلىپ جاتىر. قازاقستان ىنتىماقتاستىققا اشىق جانە جاھاندىق ەڭبەك نارىعىندا سۇرانىسقا يە كادرلاردى دايارلاۋعا باعىتتالعان ورتاق تاسىلدەردى ازىرلەۋدى قولدايدى، - دەدى عاني بەيسەمبايەۆ.
كەڭەس قورىتىندىسى بويىنشا قاتىسۋشى ەلدەر ءبىلىم مينيسترلەرىنىڭ كەڭەسى مەحانيزمىنىڭ جارعىسىن جانە «ءۇرىمجى دەكلاراتسياسىن» قابىلدادى. بۇل قۇجاتتار الداعى ىنتىماقتاستىقتىڭ نەگىزىن ايقىنداپ، جوعارى بىلىكتى ماماندار دايارلاۋ ءىسىنىڭ باسىمدىقتارىن بەكىتەدى.
ايتا كەتەرلىگى، كەلەسى مينيسترلەر كەڭەسى قازاقستاندا وتەدى. روتاتسيا تارتىبىنە سايكەس، ورتالىق ازيا ەلدەرى مەن قىتايدىڭ ءبىلىم مينيسترلەرىنىڭ ەكىنشى كەڭەسىن وتكىزۋ قۇقىعى مەن ءتوراعالىق ءبىزدىڭ ەلگە بەرىلدى.
ايتا كەتەيىك، وقۋ-اعارتۋ ءمينيسترى عاني بەيسەمبايەۆ رەسەيدە 3 قازاق مەكتەبىن سالۋ ماسەلەسىنە قاتىستى پىكىر ءبىلدىردى.
اۆتور
ەلميرا ورالبايەۆا
