بيىلعى بەس ايدا قازاقستان ەكونوميكاسى 6 پايىزعا ءوستى - پرەزيدەنت
استانا. KAZINFORM - مەملەكەت باسشىسى شەتەلدىك ينۆەستورلار كەڭەسىنىڭ 37- پلەنارلىق وتىرىسىن وتكىزدى، دەپ حابارلايدى اقوردانىڭ باسپا ءسوز قىزمەتى.
قاسىم-جومارت توقايەۆ شەتەلدىك ينۆەستورلار كەڭەسى مەملەكەت پەن ونىڭ حالىقارالىق سەرىكتەستەرى اراسىنداعى ستراتەگيالىق ىقپالداستىقتىڭ سەنىمدى پلاتفورماسى رەتىندە الداعى ۋاقىتتا دا قىزمەت كورسەتە بەرەتىنىن اتاپ ءوتتى.
- اتالعان فورۋم جيىرما جىلدان استام ۋاقىت بويى قازاقستاندا ينۆەستيتسياعا باعدارلانعان ەكوجۇيە قالىپتاستىرۋدا ماڭىزدى ءرول اتقارىپ كەلەدى. ءبىز كەڭەستىڭ بەلسەندى قاتىسۋىمەن ەلىمىزدە ينۆەستيتسيالىق احۋالدى جاقسارتۋعا، اشىقتىقتى ارتتىرۋعا جانە كاسىپكەرلىك جۇرگىزۋ شارتتارىن جەڭىلدەتۋگە باعىتتالعان كەشەندى رەفورمالاردى ودان ءارى جالعاستىرۋعا نيەتتىمىز، - دەدى مەملەكەت باسشىسى.
پرەزيدەنتتىڭ ايتۋىنشا، ساراپشىلار تاياۋ جىلدارى جاھاندىق ى ج ءو ءوسىمى شامامەن 2,9 پايىزعا دەيىن باياۋلايتىنىن بولجاپ وتىر.
- بۇگىندە ينفلياتسيالىق قىسىمنىڭ كۇشەيگەنى، جاھاندىق جەتكىزۋ تىزبەگىندەگى كەدەرگىلەردىڭ جانە ىسكەرلىك ورتاداعى باعدارسىزدىقتىڭ ارتقانى بايقالادى. مۇنداي ۇردىستەر الەم ەكونوميكاسىنىڭ پەرسپەكتيۆاسىن ناشارلاتا ءتۇسۋى ىقتيمال. بۇل حالىقارالىق سىندارلى ديالوگتىڭ قاجەت ەكەنىن كورسەتەدى. قازاقستان سەكىلدى ەلدەردىڭ ەكونوميكاسى وسىنداي سىن-قاتەرلەر كەزىندە سىرتقى داعدارىستارعا توتەپ بەرە الدى. بيىلعى بەس ايدا قازاقستان ەكونوميكاسى 6 پايىزعا ءوستى. وعان كولىك جانە لوگيستيكا، قۇرىلىس، ساۋدا، تاۋ-كەن ونەركاسىبى جانە وڭدەۋ سالالارى كوپ ۇلەس قوستى، - دەدى پرەزيدەنت.
قاسىم-جومارت توقايەۆ قازاقستاننىڭ شيكىزاتتى تەرەڭ وڭدەۋ جانە جاڭا بۋىنداعى ونەركاسىپتىك ءوندىرىس قۇرۋ جولىندا باتىل قادام جاساعانىنا نازار اۋداردى.
مەملەكەت باسشىسى قازاقستان تەمىرجول سالاسىنا ارنالعان ماشينا جاساۋ بويىنشا Wabtec, Alstom جانە Stadler كومپانيالارىمەن تابىستى ىنتىماقتاستىق ورناتقانىن جەتكىزدى. اتاپ ايتقاندا، Alstom كومپانياسى ەلىمىزدە سەرۆيستىك ورتالىقتار سالىپ، 2028 -جىلدان باستاپ لوكوموتيۆتەردىڭ جاڭا بۋىنىن شىعارۋدى جوسپارلاپ وتىر. Wabtec كومپانياسى بالاما وتىنمەن جۇرەتىن جىلجىمالى قۇرامعا 200 ميلليون دوللار ينۆەستيتسيا قۇيدى. ال Stadler Rail كاسىپورنى وندىرىستىك قۋاتى جىلىنا 100 ۆاگون شىعاراتىن زاۋىت سالدى.
قاسىم-جومارت توقايەۆ قازاقستاننىڭ اگروونەركاسىپ كەشەنىنىڭ جوعارى الەۋەتىنە توقتالدى. ەلىمىز ەگىستىككە جانە جايىلىمعا جارامدى جەر كولەمى جاعىنان الەمدە التىنشى ورىندى يەلەنەدى، سونداي-اق استىق ەكسپورتى بويىنشا جەتەكشى ون مەملەكەتتىڭ قاتارىنا كىرەدى. مەملەكەت باسشىسى PepsiCo, Fufeng Group جانە Dalian Hesheng سياقتى شەتەلدىك ينۆەستورلاردىڭ تابىستى قىزمەتىن مىسالعا كەلتىرىپ، ولاردىڭ جەرگىلىكتى ونىمگە تۇراقتى سۇرانىس قالىپتاستىرىپ، وزىق تەحنولوگيالاردى ەنگىزىپ جاتقانىن ايتتى.
وسىعان دەيىن پرەزيدەنت قازاقستاندىقتاردى سۋديا جانە سوت قىزمەتكەرى كۇنىمەن قۇتتىقتاعان بولاتىن.
