بيىلعى 8 ايدا سىرتقى تاۋار اينالىمى 124 ميلليارد دوللارعا جەتتى
استانا. KAZINFORM - وسى جىلدىڭ 8 ايىندا ەلىمىزدىڭ ءۇشىنشى مەملەكەتتەرمەن سىرتقى تاۋار اينالىمى 124 ميلليارد دوللارعا جەتتى.
بۇل تۋرالى قارجى مينيسترلىگىنىڭ مەملەكەتتىك كىرىستەر كوميتەتى ءتوراعاسى ورىنباسارىنىڭ مىندەتىن اتقارۋشى عابيت ورازوۆ ايتتى.
«ءۇشىنشى ەلدەرمەن سىرتقى تاۋار اينالىمى 2024 -جىلعى 8 ايدا 124 ميلليارد ا ق ش دوللارىن، ونىڭ ىشىندە ەكسپورت - 94 ميلليارد ا ق ش دوللارىن، يمپورت 28,5 ميلليارد ا ق ش دوللارىن قۇرادى. ەسەپتى كەزەڭدە 819 مىڭ ترانزيتتىك دەكلاراتسيا رەسىمدەلدى نەمەسە وتكەن جىلعى ۇقساس كەزەڭمەن سالىستىرعاندا 119,4 مىڭعا ارتىق ءوسىم قارقىنى 17 پايىز بولدى. وتكىزىلگەن تاۋارلاردىڭ جالپى سالماعى 13 ميلليون تونناعا جۋىقتادى. ءوسىم قارقىنى - 12 پايىز»، - دەدى ول ورتالىق كوممۋنيكاتسيالار قىزمەتىندەگى بريفينگتە.
ونىڭ اتاپ وتۋىنشە، 2023 -جىلى مەملەكەتتىك كىرىستەر كوميتەتى بۇگىنگى كۇنى ەاەو سىرتقى جانە ىشكى شەكاراسىنداعى بارلىق اۆتوموبيل وتكىزۋ پۋنكتىندە ءساتتى جۇمىس ىستەيتىن يننوۆاتسيالىق ەلەكتروندىق كەزەك جۇيەسىن ەنگىزدى. جۇيە «Qoldau.kz» پلاتفورماسىندا جانە «CargoRuqsat» موبيلدى قوسىمشاسى ارقىلى جۇمىس ىستەيدى.
«2024 -جىلعى 8 ايدا ءۇشىنشى ەلدەرمەن شەكاراداعى اۆتوموبيل وتكىزۋ پۋنكتتەرى ارقىلى 860 مىڭنان استام اۆتوكولىك قۇرالى ءوتتى. وتكەن جىلدىڭ 8 ايىندا 621 مىڭنان استام اۆتوكولىك قۇرالدارى ءجۇرىپ وتكەن ەدى. ترانزيتتىك دەكلاراتسيانى رەسىمدەگەنى ءۇشىن 18,5 ميلليارد تەڭگە سوماسىنا كەدەندىك الىمدار ءوندىرىلىپ الىندى»، - دەدى عابيت ورازوۆ.
اۆتور
مارلان جيەمباي
