بيىل قازاقستانعا قىتايدان كەلەتىن تۋريستەر سانى 500 مىڭعا دەيىن ارتۋى مۇمكىن
استانا. KAZINFORM - بيىل استانادا دۇنيەجۇزىلىك كوشپەندىلەر ويىندارى، شىمكەنتتە گاسترونوميالىق فەستيۆال، الماتى وبلىسىندا شارلار فەستيۆالى، وڭىرلەردە الپينيادا مەن باسپا ءسوز تۋرلارىن وتكىزۋ جوسپارلانىپ وتىر.

بۇل تۋرالى ق ر تۋريزم جانە سپورت مينيسترلىگىنىڭ تۋريزم يندۋسترياسى كوميتەتىنىڭ ءتوراعاسى نۇرتاس كارىپبايەۆ ورتالىق كوممۋنيكاتسيالار الاڭىندا حابارلادى.
تۋريستىك ماۋسىمعا دايىندىقتىڭ تاعى ءبىر اسپەكتىسى - ماركەتينگتىك ءىس-شارالار. وڭىرلەردە بىرەگەي تابيعي جانە مادەني كورىكتى جەرلەرگە نازار اۋدارا وتىرىپ، تۋريستەردى تارتۋ ءۇشىن ارنايى باعدارلامالار ازىرلەندى.
ەلىمىزدىڭ تۋريستىك الەۋەتىن ناسيحاتتاۋ ماقساتىندا قازاقستان بەرلين، دۋباي جانە شاڭحايداعى ءىرى تۋريستىك جارمەڭكەلەردە تانىستىرىلدى. سونىمەن قاتار قازاقستان تۋرالى ءىرى حالىقارالىق پلاتفورمالاردا دا ءجيى ايتىلۋدا. سونداي-اق الماتى قالاسى The New York Times نۇسقاسى بويىنشا ۇزدىك 52 تۋريستىك باعىتتىڭ قاتارىنا ەندى.
«Conde Nast Traveller جانە Wanderlust، قازاقستاندى 2024- جىلى ساياحاتتاۋعا ارنالعان الەمدىك دەستيناتسيالاردىڭ قاتارىنا قوستى. وعان قوسا، Conde Nast Traveller Italia «شىمبۇلاق» تاۋ كۋرورتىن توپ-5 تاۋ شاڭعىسى دەستيناتسياسىنا ەنگىزدى. وسى جىلدىڭ قاڭتار ايىندا، ەل India Today نۇسقاسى بويىنشا «ءۇندى ساياحاتشىلارى ءۇشىن جەتەكشى باعىت» اتاعىن الدى. قازاقستان Skyscanner دەرەكتەرى بويىنشا ءۇندىستان نارىعى ءۇشىن №1 دەستيناتسيا بولىپ تابىلادى، سونداي-اق بيىل ورازا كەزىندە ب ا ءا تۋريستەرى اراسىندا ەڭ تانىمال تۋريستىك باعىتتاردىڭ كوشىن باستادى. سايكەسىنشە، Forwardkeys دەرەكتەرى بويىنشا قازاقستان قىتايدان كەلەتىن تۋريستەر اعىنىن قالپىنا كەلتىرۋدىڭ ەڭ جوعارى كورسەتكىشىنە يە: ءوسىم %212، بۇل قازاقستاندى ق ح ر ازاماتتارى ءۇشىن ەڭ تانىمال 50 تۋريستىك باعىتتىڭ قاتارىنا قوسادى»، - دەدى ۆەدومستۆو وكىلى.
2024 -جىل قىتايداعى قازاقستاندىق تۋريزم جىلى بولىپ جاريالاندى. 28-29 - ناۋرىز ارالىعىندا بەيجىڭدە تۋريزم جىلى اشىلدى، ونىڭ اياسىندا ەكى ەلدىڭ تۋريستىك بيزنەسىنىڭ 300-دەن استام وكىلدەرىنىڭ قاتىسۋىمەن فورۋم ءوتتى. بيىل قازاقستان تۋريزمىنىڭ تۇرلەرى بويىنشا تاقىرىپتىق اپتالاردى وتكىزۋدى، قىتايدىڭ 7 ءىرى قالاسىندا توپ-20 وتاندىق دەستيناتسيالاردىڭ تۇساۋكەسەرىن، سونداي-اق قازاقستاننىڭ قىتايداعى تۋريستىك الەۋەتىن ىلگەرىلەتۋ جونىندەگى باسقا دا ءبىرقاتار ءىرى جوبانى قامتيتىن 30-دان استام ءىس-شارا وتكىزۋ جوسپارلانعان. ناتيجەسىندە، بيىلعى قورىتىندى بويىنشا ق ح ر- دان كەلۋشىلەر سانى 500 مىڭ ادامعا دەيىن ۇلعايۋى مۇمكىن.
اۆتور
ايدار وسپاناليەۆ