بيىل ءتورتىنشى مۇناي وڭدەۋ زاۋىتى بويىنشا ناقتى شەشىم بولادى

بۇگىن ۇكىمەت وتىرىسىنان كەيىنگى باسپا ءسوز ءماسليحاتىندا قازاقستاندا ءتورتىنشى مۇناي وڭدەۋ زاۋىتىن سالۋ جوسپارىنا قاتىستى سۇراق قويىلدى.

- وسى سۇراققا ناقتى جاۋاپ بەرەمىن. اتاپ ايتقاندا، ءتورتىنشى زاۋىت ىسكە اسىرىلادى. قازىرگى تاڭدا تەحنيكالىق-ەكونوميكالىق نەگىزدەمەلەر پىسىقتالىپ جاتىر. اسىرەسە، «سامۇرىق-قازىنا» قورى وسى باعىتتا جۇمىسىن جۇرگىزىپ جاتىر. وسى جىلدىڭ اياعىنا دەيىن ناقتى شەشىم قابىلدانادى، - دەدى ە. اقكەنجەنوۆ.

ونىڭ ايتۋىنشا، قازىر زاۋىت سالىناتىن ورىندى تاڭداۋعا قاتىستى تالقىلاۋ ءجۇرىپ جاتىر. بۇل تۇرعىدا ماڭعىستاۋ، اتىراۋ، ۇلىتاۋ وبلىستارىنداعى، سونداي-اق ەلدىڭ وڭتۇستىك وڭىرىندەگى الاڭدار زەرتتەلىپ جاتىر.

- بۇل باعىتتا ەلەكتر ەنەرگياسى مەن سۋمەن قامتاماسىز ەتۋ كوزدەرى، سونداي-اق باسقا قاجەتتىلىكتەردىڭ ءبارى نازارعا الىنادى. نەگىزى، وسى جوبانى ىسكە اسىرۋ ءۇشىن 3 نەمەسە 4 جىل كەرەك. تەحنيكالىق-ەكونوميكالىق نەگىزدەمە جانە جوبالىق قۇجاتتامالاردى، قۇرىلىس جۇمىستارىن جۇرگىزۋدى ەسكەرە وتىرىپ، 4 جىلدىڭ شاماسىندا ىسكە اسىرىلادى، - دەدى مينيستر.

بۇعان دەيىن ءتورتىنشى مۇناي وڭدەۋ زاۋىتىن سالۋعا 10 ميلليارد دوللار جۇمسالۋى مۇمكىن ەكەنى ايتىلعان ەدى.