بيۋدجەتتىڭ كىرىس بولىگىن قامتاماسىز ەتۋ باعىتىندا جۇمىستى ەداۋىر كۇشەيتۋ قاجەت - ولجاس بەكتەنوۆ

استانا. KAZINFORM - رەسپۋبليكالىق بيۋدجەتتىڭ كىرىس بولىگىن قامتاماسىز ەتۋ باعىتىندا جۇمىستى ەداۋىر كۇشەيتۋ قاجەت. بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ ايتتى.

«مەملەكەت باسشىسىنىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىنىڭ ءاربىر جولى - قازىرگى زاماننىڭ شىنايى تالاپتارى مەن سىن-قاتەرلەرىنە جاۋاپ بەرەتىن ماڭىزدى ءارى دەر كەزىندە جاريالانعان قۇجات. پرەزيدەنتتىڭ جولداۋىن ساپالى ىسكە اسىرۋ ءبىزدىڭ باستى مىندەتىمىز. مەملەكەت باسشىسى اتاپ وتكەندەي، بۇل ماقساتقا ەكونوميكانىڭ قۇرىلىمىن وزگەرتۋ ارقىلى قول جەتكىزە الامىز. سالالارداعى مۇنداي وزگەرىستەر قازىردىڭ وزىندە تاۋ-كەن سەكتورىنىڭ ۇلەسىن ازايتىپ، وڭدەۋ ونەركاسىبىنىڭ ءوسۋ قارقىنىن ارتتىرۋعا مۇمكىندىك بەردى. سونداي-اق ءبىز جوعارى دەڭگەيدە وڭدەلگەن ءونىم شىعارۋعا باسىمدىق بەرەتىن بولامىز. بۇل سالانىڭ الەۋەتى ۇلكەن»، - دەدى وتىرىستا اشقان پرەمەر-مينيستر.

وسى رەتتە ولجاس بەكتەنوۆ مەملەكەت باسشىسى ۇكىمەت پەن اكىمدىكتەر بارىننشا كوڭىل ءبولۋى ءتيىس پروبلەمالاردى ناقتى بەلگىلەپ بەرگەنىن ەسكە سالدى.

«بارلىق مەملەكەتتىك ورگاندار پرەزيدەنت ايتقان تاپسىرمالاردى جان-جاقتى پىسىقتاپ، قويىلعان مىندەتتەردى شەشۋدىڭ ناقتى جولدارىن ايقىنداۋى قاجەت. بۇل رەتتە ءبىز بيۋدجەت قاراجاتىن وڭتايلى جۇمساۋعا بارىنشا كوڭىل ءبولۋىمىز كەرەك. رەسپۋبليكالىق بيۋدجەتتىڭ كىرىس بولىگىن قامتاماسىز ەتۋ باعىتىندا جۇمىستى ەداۋىر كۇشەيتۋ قاجەت. جولداۋدا ينۆەستيتسيالىق احۋالدى جاقسارتۋ، ەلدىڭ ونەركاسىپتىك الەۋەتىن اشۋ، ينفراقۇرىلىمدىق پروبلەمالاردى شەشۋ جونىندەگى ماقساتتار كورسەتىلگەن»، - دەدى ۇكىمەت باسشىسى.