بۇقتىرماداعى كوپىر قۇرىلىسىنا شەتەلدىك جۇمىس كۇشى تارتىلماعان
وسكەمەن. KAZINFORM - شىعىس قازاقستان وبلىسىنداعى بۇقتىرما سۋ قويماسىنا پرەزيدەنت تاپسىرماسىمەن سالىنىپ جاتقان كوپىر قۇرىلىسىنا شەتەلدىك جۇمىس كۇشى تارتىلماعان. بۇل تۋرالى ءوڭىر اكىمدىگىندە وتكەن جينالىس بارىسىندا ءمالىم بولدى.
قازىر بۇقتىرما سۋ قويماسىنداعى كوپىر قۇرىلىسى اياقتالۋعا شاق قالدى. جوسپار بويىنشا قازاقستانداعى ەڭ ۇزىن كوپىر (1316 مەتر) رەسپۋبليكا كۇنىندە اشىلۋى ءتيىس.
«كوپىردىڭ اشىلۋى وبلىس تۇرعىندارى ءۇشىن تاريحي وقيعا بولايىن دەپ تۇر. قۇرىلىس جۇمىستارىنا شەتەلدىك جۇمىس كۇنى مۇلدە تارتىلماعان. ءبىزدىڭ ينجەنەرلەرىمىز، ساۋلەتشىلەرىمىز بەن جۇمىسشىلارىمىز كوپىردى باستان-اياق سالىپ شىقتى. سوندىقتان بۇل تولىققاندى وتاندىق جوبا دەۋىمىزگە ابدەن بولادى»، - دەدى وبلىس اكىمى ەرمەك كوشەربايەۆ.
ەسكە سالساق، وسىعان دەيىن بۇقتىرمادا سالىنىپ جاتقان كوپىردىڭ ەكى جاعىنا بەكەت قويىلۋى مۇمكىن ەكەندىگى حابارلانعان.
اۆتور
تالعاتجان مۇحامەتبەك ۇلى
