بەكتەنوۆ شەتەلدىك اۋىل شارۋاشىلىعى تەحنيكاسىنا ليزينگ بەرۋ نەگە توقتاتىلعانىن ايتتى

استانا. KAZINFORM - پارلامەنت پالاتالارىنىڭ بىرلەسكەن وتىرىسىندا پرەمەر-مينيستر ولجاس بەكتەنوۆ شەتەلدىك اۋىل شارۋاشىلىعى تەحنيكاسىنا ليزينگ بەرۋ نەگە توقتاتىلعانىن ايتتى.

«اۋىل شارۋاشىلىعىن ايتساق، ەگىس جۇمىستارىن قارجىلاندىرۋ بيىل 4 ەسە ءوستى. ياعني، 540 ميلليارد تەڭگە ديقاندارعا جىبەرىلدى. وعان قوسا جاڭا ليزينگتىك باعدارلاماعا 100 ميلليارد تەڭگە جىبەرىلدى. ول باعدارلاما ارقىلى اۋىل شارۋاشىلىعى تەحنيكاسىن ساتىپ الدى. اۋىل شارۋاشىلىعى تەحنيكاسىن ايتساق، ءبىز بيىل يمپورتتىق تەحنيكاعا بەرىلەتىن سۋبسيديالاردى توقتاتتىق. ءبىزدىڭ پىكىرىمىزشە، ءبىز ءوزىمىزدىڭ بيۋدجەت قاراجاتىمىزدىڭ ەسەبىنەن باسقا ەلدىڭ ەمەس، تەك ءوز وندىرۋشىلەرىمىزدى قولداۋىمىز قاجەت. جالپى وتاندىق وندىرۋشىلەردى قولداۋ باعىتىنا كەلەر بولساق، بۇل مەن باسقارىپ وتىرعان ۇكىمەتتىڭ نەگىزگى باسىمدىقتارىنىڭ ءبىرى»، - دەدى پرەمەر- مينيستر.

سونداي-اق ول بيىل 6,5 مىڭ شاقىرىم كوممۋنالدىق جەلى جوندەلەتىنىن اتاپ ءوتتى.

«اۆتوموبيل جولدارىنا توقتالساق، بيىل 12 مىڭ شاقىرىم اۆتوموبيل جولدا قۇرىلىس، كۇردەلى جوندەۋ جانە جوندەۋ جۇمىستارى جۇرگىزىلەدى. بۇل - ۇلكەن كورسەتكىش. بيىل 13 ارنايى ەكونوميكالىق جانە يندۋستريالدىق ايماق قاجەتتى ينفراقۇرىلىممەن قامتاماسىز ەتىلەدى. بۇل - كوپ يندۋستريالدىق جوبالاردى ىسكە قوسۋعا مۇمكىندىك بەرەتىن قادام. 1800 شاقىرىم گاز قۇبىرى سالىنادى. ول دەگەنىمىز 300 مىڭ تۇرعىنى بار 67 ەلدى مەكەن بيىل گازعا قول جەتكىزەدى دەگەن ءسوز. 6,5 مىڭ شاقىرىم كوممۋنالدىق جەلى جوندەۋدەن وتكىزىلەدى. 70 جاڭا ينۆەستيتسيالىق جوبا ىسكە قوسىلادى. ول شيكىزات ەمەس، جوعارى وڭدەلگەن تاۋار وندىرۋگە باعىتتالادى. سوندىقتان ءبىز ونى قولداپ جاتىرمىز»، - دەدى ولجاس بەكتەنوۆ.

اۆتور

ەسىمجان ناقتىباي