«بايتەرەك» كەشەنىنەن 2025 -جىلدىڭ اياعىندا العاشقى زىمىران ۇشىرىلادى
استانا. قازاقپارات - «بايتەرەك» عارىشتىق زىمىران كەشەنىنەن 2025 -جىلدىڭ اياعىندا العاشقى زىمىران ۇشىرىلادى. سىناق كەزەڭى 2027 -جىلعا دەيىن جوسپارلانعان.
سودان كەيىن عانا كوممەرتسيالىق جوبالار جۇزەگە اسا باستايدى. عارىشتىق تەحنولوگيالاردى دامىتۋعا باعىتتالعان جوبا قازىر قانداي دەڭگەيگە جەتتى؟
«بايتەرەك» عارىش كەشەنىنەن كەلەسى جىلى «سويۋز 5» زىمىرانى زەڭگىر كوككە جول تارتادى. بۇل جوبا بولاشاقتا تابىستى بولادى. ايتۋلى سالانىڭ قىزمەتىنە سۇرانىس الەمدە جىل سايىن ارتىپ كەلەدى. ەڭ باستىسى عارىشتىق تەحنولوگيانى مەڭگەرگەن مامانداردىڭ كوبەيۋىنە جول اشىلادى. باۋبەك ورالماعامبەتوۆ، ق ر ايەروعارىش كوميتەتىنىڭ ءتوراعاسى:
- بۇل يننوۆاتسيالىق جوبا بولعاندىقتان ارينە بىزگە كوپ دەگەن ماماندار كەرەك، ولاردى وقىتۋ كەرەك، ولار پراكتيكادان ءبىزدىڭ كەشەندە ءوتۋ كەرەك. كوپ دەگەن سپۋتنيك توپتارىن ۇشىراتىن تاپسىرىستار بولا بەرەدى. ولاردىڭ تاپسىرىستارىنىڭ بارلىعىن عارىشتىق كەشەنگە شىعارۋ ءۇشىن عارىشتىق زىمىران ارقىلى شىعارۋ كەرەك. ءبىزدىڭ «بايتەرەك» سياقتى. جوبانى جۇزەگە اسىرۋ ءۇشىن 2018 -جىلى «زەنيت» عارىشتىق كەشەنى رەسەيدەن قازاقستان مەنشىگىنە ءوتتى. بۇگىندە نىسان قايتا جاڭعىرتىلۋدا.
مامانداردىڭ ايتۋىنشا بۇل جەردەن ۇشىرىلاتىن زىمىران تاسىعىش قازىرگى تالاپتارعا تولىق ساي كەلەدى.
كەزىندە بۇل جەردەن «زەنيت» زىمىراندارى ۇشىرىلعان. ال كەلەسى جىلدان باستاپ ەكولوگيالىق تازا وتىندى پايدالاناتىن «سويۋز 5» زىمىراندارى وسى تۇعىردان كوككە سامعايتىن بولادى. بۇل جەردى قايتا قالپىنا كەلتىرۋ جۇمىستارى ءتيىستى كەستەگە ساي ءجۇرىپ جاتىر.
ايدىن ايىمبەتوۆ، «بايتەرەك» ب ك باسقارما ءتوراعاسى:
- قازىر جەر ۇستىندەگى نىساندارعا قۇرىلعىلاردى ورناتۋ جۇمىستارى ءجۇرىپ جاتىر. بۇل جۇمىستاردى ءبىر جارىم جىلدىڭ ىشىندە اتقارۋ جوسپارلانعان. جوبا جۇزەگە اسقان كەزدە وتاندىق جەرسەرىكتەرمەن قاتار شەتەلدىڭ دە قۇرىلعىلارىن ۇشىرامىز. زىمىران ۇشىرىلىمدارىن باسقارۋ ورتالىعى دا تولىق قايتا جابدىقتالادى. ول ءۇشىن سوڭعى ۇلگىدەگى تەحنولوگيالار قولدانىلادى.
24.kz
