بايقوڭىرداعى مەكتەپ رەسەيدىڭ ءبىلىم بەرۋ ستاندارتىنان قازاقستاندىق ستاندارتقا كوشتى

قارماقشى اۋدانىنىڭ ءبىلىم ءبولىمى حابارلاعانداي، مەكتەپ عيماراتى «بايقوڭىر» كەشەنى جونىندەگى قازاقستان- رەسەي ۇكىمەتارالىق كوميسسياسىنىڭ بىرلەسكەن شەشىمىنە سايكەس قالا اكىمشىلىگىنىڭ جالعا بەرۋ قورىنان شىعارىلدى.

- ول قازاقستان رەسپۋبليكاسىنىڭ كوممۋنالدىق مەنشىگىنە ءوتىپ، № 298 ورتا مەكتەپ اتاۋىن يەلەندى. ءبىلىم ۇيىمى جاڭا وقۋ جىلى قارساڭىندا حالىق يگىلىگىنە پايدالانۋعا بەرىلدى. № 298 ورتا مەكتەپتىڭ جوبالىق قۋاتى — 790 ورىن. عيماراتتىڭ جالپى اۋماعى — 6908,37 شارشى مەتر. جاڭا وقۋ جىلىنا دايىندىق اياسىندا جوندەۋ جۇمىسى جۇرگىزىلىپ، مەكتەپتىڭ ماتەريالدىق- تەحنيكالىق بازاسى جاڭاردى، — دەلىنگەن حابارلامادا.

سونىمەن قاتار كادرلىق قامتاماسىز ەتۋ، وقۋشى قابىلداۋ جانە وقۋ-تاربيە ۇدەرىسىن ۇيىمداستىرۋ جۇمىسى تولىق اياقتالىپ، مەكتەپ جاڭا وقۋ جىلىندا ءوز جۇمىسىن باستادى.

بۇعان دەيىن حابارلاعانىمىزداي، بايقوڭىر قالاسىندا 11 مەكتەپ بار. ونىڭ 6-ى قازاقستاندىق ءبىلىم بەرۋ ستاندارتى بويىنشا وقىتادى.