باستەسۋگە دايىنمىن - جاسلان ماديەۆ جۋرناليستەردى ينتەرنەت باعاسى ارزانداعانىنا سەندىرە الماي كەتتى

استانا. KAZINFORM - سيفرلىق دامۋ، يننوۆاتسيالار جانە ايەروعارىش ونەركاسىبى ءمينيسترى جاسلان ماديەۆ ءماجىلىس كۋلۋارىندا جۋرناليستەرمەن ينتەرنەت باعاسى تاريفى تۋرالى ۇزاق پىكىر تالاستىردى.

- ينتەرنەت باعاسى تۋرالى ايتساق، 2024 -جىلى 1 گبايت ترافيكتىڭ باعاسى ارزانداتىلدى. موبيلدىك بايلانىستاعى ينتەرنەت ترافيگى شامامەن 12 پايىز، ال بەكىتىلگەن تاريفتەر 25 پايىز ارزاندادى. مەن ونى ناقتى ساندارمەن دالەلدەپ بەرە الامىن، - دەگەن مينيستر سول ساتتە-اق جۋرناليستەر الدىندا ول ءۋاجىن دالەلدەيتىن ناقتى مالىمەتتەر قولىندا جوق ەكەنىن ايتىپ، اقتالدى.

ۆەدومستۆو باسشىسى قىزدى-قىزدىمەن بۇل ماسەلە بويىنشا جۋرناليستەرمەن باستەسۋگە دايىن ەكەنىن ايتتى.

- بالكىم، ءسىز بۇرىنعىدان كوپ تولەپ جۇرگەن شىعارسىز. ءبىراق 1 گبايت ترافيك ءۇشىن تولەگەن اقشاڭىزدى ءبولىپ قاراساڭىز، شىنىمەن دە ارزانداعانىن كورەتىن ەدىڭىز. ءتىپتى بەكىتىلگەن تاريف اياسىندا 1 مبيت/سەكۋند ولشەمىمەن الىپ ەسەپتەسەڭىز، بۇل جەردە ارزانداي تۇسكەن. ەگەر اي سايىن تاريفتەر قىمباتتاپ جاتسا، تۇتىناتىن ينتەرنەتتىڭ كولەمى ارتتى دەگەن ءسوز. مەن سىزدەرمەن باستەسە الامىن. 1 گبايت ينتەرنەتتىڭ باعاسى بۇرىنعىدان ارزان، - دەدى ول.

ايتۋىنشا، ينتەرنەتتىڭ ابسوليۋتتى قۇنىنا اسەر ەتەتىن كوپتەگەن فاكتور بار.

- ونىڭ ىشىندە ينفلياتسيا دا، ينۆەستيتسيالىق باعدارلامالاردىڭ شىعىنى دا، باعانى اقىلداسىپ بەلگىلەۋ دە بار. ءتيىستى اگەنتتىك ول بويىنشا تەكسەرۋ جۇرگىزىپ جاتىر. قىمبات قوندىرعىلار ساتىپ العان بولۋى مۇمكىن. قازاقستاندا وندىرىلمەگەن قوندىرعى ساتىپ الىنسا، تەڭگە قۇنسىزدانعان كەزدە ونىڭ ءبارى ترافيك قۇنىنا اسەر ەتەدى. قازاقستاندا ترافيك جۇكتەمەسى ايتارلىقتاي ءوسىپ جاتىر. ينتەرنەت تۇتىنۋ كولەمى ارتقان سايىن موبيلدىك وپەراتورلارداعى شتات سانى دا ءوسىپ جاتىر. تالداۋلار موبيلدىك بايلانىستىڭ ينتەرنەت باعاسى ءبىر جىلدا 11,8 پايىز ارزانداعانىن كورسەتىپ وتىر. قازاقستاندىقتار ورتاشا ەسەپپەن اي سايىن 20 گبايتتان استام ينتەرنەت تۇتىنادى. قۇرمەتتى جۋرناليستەر مەن سىزدەرگە ايتارلىقتاي ەگجەي-تەگجەيلى جاۋاپ بەردىم دەپ ويلايمىن. كەيىن قوسىمشا تالداۋدى ۇسىنا الامىز، - دەپ تۇيىندەدى جاسلان ماديەۆ.

ەسكە سالساق، بيىل ناۋرىزدا KCell, Tele2, Beeline كومپانيالارىنىڭ ۇستىنەن تاريف كوتەرۋ تۋرالى «ءسوز بايلاسۋ» كۇدىگىمەن تەكسەرۋ باستالعان ەدى. ءبىراق 22 -مامىردا ول تەكسەرۋ توقتاتىلعانى ءمالىم بولدى.

اۆتور

ەسىمجان ناقتىباي