باقىتجان بازاربەك: بانكتەر 10 ميلليون گەكتار جەردىڭ قۇپياسىن مەملەكەتكە اشپاي وتىر
استانا. KAZINFORM - ءماجىلىس دەپۋتاتى باقىتجان بازاربەك «بانك قۇپياسى» ۇعىمىنىڭ سالدارىنان 10 ميلليون گەكتار جەردىڭ مەملەكەتكە قايتارىلماي جاتقانىن ءمالىم ەتتى.
- زاڭ جوباسىنداعى 69-باپتى الايىق. بانكتەر مەملەكەتتىك ورگاندار سۇراۋ سالعان جاعدايدا مۇلىك مالىمەتتەرى تۋرالى بانك قۇپياسىن بەرەتىنى ايتىلعان. قازىر ءبىزدىڭ مەمورگاندار سۇراۋ جىبەرىپ جاتىر. ءبىراق ءبارى «بانك قۇپياسى» دەپ بويىن اۋلاق الىپ قاشادى. وسى زاڭ جوباسىندا «بانك قۇپياسى» دەگەن كەدەرگىنى اينالىپ وتەتىن شىعارمىز دەپ ويلاعانمىن. مىسالى، يگەرىلمەي جاتقان جەرلەردى قايتارۋ كەزىندە مىنا ماسەلەگە تاپ بولدى. 5-تەن 10 ميلليون گەكتارعا دەيىن جەر ەكىنشى دەڭگەيلى بانكتەردىڭ قولىندا قالىپ وتىر. ول القاپتاردى مەملەكەتكە قايتارىپ، اينالىمعا شىعارا الماي وتىرمىز. ويتكەنى بانكتەر مەملەكەتتىك ورگاندارعا «بانك قۇپياسىنا» سۇيەنىپ جاۋاپ بەرمەي وتىر. جەر كودەكسىنىڭ 93, 94-باپتارىندا بانكتەر 6 ايدان استام ۋاقىت يگەرمەگەن جەردى مەملەكەتكە قايتارۋ كەرەكتىگى ايتىلعان. زاڭ جوباسىنىڭ 69-بابى ول نورماعا قايشى، - دەدى باقىتجان بازاربەك.
قارجى نارىعىن رەتتەۋ جانە دامىتۋ اگەنتتىگىنىڭ ءتورايىمى ءمادينا ءابىلقاسىموۆا بانك قۇپياسىن اشۋعا نەگىز بولاتىن تالاپتار تىزبەسى بار ەكەنىن، ءوزى تانىستىرعان زاڭ جوباسى ارقىلى ول تىزبەنى كەڭەيتۋگە ەشقانداي قاجەتتىلىك جوق دەپ ەسەپتەيتىنىن ايتتى.
- دەگەنمەن ناقتى جەر تەلىمدەرىنە قاتىستى ماسەلەنى شەشۋدىڭ باسقا جولدارى بار. كىمنىڭ يەلىگىندە قانشا جەر بار ەكەنىن بىلۋگە، ول تۋرالى مالىمەتتەردى مەملەكەتتىك ورگاندارعا بەرۋگە بولادى، - دەدى اگەنتتىك باسشىسى.
ايتا كەتەيىك، ءدال قازىر ۇلتتىق بانك پەن قارجى نارىعىن دامىتۋ جانە رەتتەۋ اگەنتتىگى ماجىلىستە بانكتەر تۋرالى زاڭ جوباسى تانىستىرىپ جاتىر.
